پاکستان تے ترکیہ وچال چاول دی تجارت کوں ودھاوݨ تے اتفاق

اسلام آباد۔ 28 جنوری (اے پی پی) وفاقی وزیرِ تجارت جام کمال خان نال پاکستان اچ تعینات ترکیہ دے سفیر ڈاکٹر عرفان نذیر اوغلو ملاقات کیتی اے۔ ملاقات اچ ݙوپاسہ تجارتی تعاون کوں ودھاوݨ تے خاص طور تے پاکستان توں ترکیہ کوں چاول دی برآمدات ودھاوݨ تے ڳالھ مہاڑ کیتی ڳئی۔ اے ملاقات وزیرِ اعظم محمد شہباز شریف دی ہدایت تے تھئی اے، جنھاں عالمی مقابلے اچ اضافے دے تناظر اچ زرعی برآمدات خاص طور تے چاول دے فروغ کوں ترجیح ݙتی اے۔ وفاقی وزیر آکھیے جو ایں سیزن اچ پاکستان اچ چاول دی ٻہوں چنگی پیداوار تھئی اے، جیندے نال اعلیٰ معیار دا وافر برآمدی مال دستیاب اے پیا۔ تاہمت انھاں ݙسائے جو بھارت تے ویتنام سویں ملکاں دی قیمت گھٹ ہووݨ پاروں عالمی منڈی اچ قیمت تے دباؤ اے ، بھانویں جو پاکستان آپݨی برآمدی مقدار برقرار رکھے ہوئے اے۔ انھاں آکھیے جو حکومت قیمت دے حوالے نال ہک طریقہ بݨائے تاں جو عالمی منڈی اچ مقابلہ کر سڳوں۔ پاکستان ترکیہ کوں باسمتی تے نان باسمتی ݙوہیں قسماں دے چاول بین الاقوامی ریٹ تے فراہم کرݨ کیتے تیار اے ۔ پاکستان دا اصل ہدف قیمت ودھاوݨ نئی بلکہ برآمدی حجم ودھاوݨ اے تاںجو کساناں دی آمدن محفوظ رہ سڳے۔ ترکیہ دے سفیر پاکستان دی تجویزاں دا خیرمقدم کیتے اتے آکھیے جو سیاسی تعلقات تگڑے ہووݨ دے باوجود تجارتی حجم حالے گھٹ اے ۔ ݙوہیں ملکاں ایں ڳالھ تے اتفاق کیتے جو کاروباری برادریاں اچ رابطے ودھائے ویسن۔