فلسطینی عوام نال پاکستان دی یکجہتی تاریخی اے، ساڄھےدار ملکاں نال رل تے مسئلہ فلسطین دے منصفانہ اتے دیرپا حل سانڳے حمایت جاری رکھسوں، نائب وزیراعظم و وزیرِ خارجہ اسحاق ڈار

نیویارک۔22 ستمبر(اے پی پی)نائب وزیراعظم تے وزیرِ خارجہ محمد اسحاق ڈار فلسطینی عوام نال پاکستان دی غیر متزلزل یکجہتی دوہریندے غزہ اتے مغربی کنارے دی صورتحال تے ݙاݙھا چنتا کریندے آکھیے جو ساڄھےدار ملکاں نال رل تے مسئلہ فلسطین دے منصفانہ اتے دیرپا حل سانڳے حمایت جاری رکھسوں، غزہ دی تعمیرِ نو اتے حکمرانی دے انتظامات فلسطینی قیادت اچ ہووݨے چاہیدن ڄنہاں اچ فلسطینی اتھارٹی دا مرکزی کردار ہووے۔ انہاں اے ڳالھ اقوامِ متحدہ دی جنرل اسمبلی دے 81ویں اجلاس اچ فلسطین بارے او آئی سی “کمیٹی آف سکس” اچ کیتی۔ نائب وزیراعظم تے وزیرِ خارجہ اسحاق ڈار او آئی سی دے سیکرٹری جنرل کیتے اتفاقِ رائے نال انتخاب تے اسماعیل شیخ محمد کوں مبارکباد ݙتی۔ انہاں فلسطینی عوام نال پاکستان دی غیر متزلزل یکجہتی دوہرائی۔ انہاں غزہ تنازعے دے خاتمے دے جامع منصوبے تے عملدرآمد کوں اڳو تے ودھاوݨ کیتے امریکا، مصر، قطر اتے ترکیہ دی ثالثی دیاں کوششاں کوں سراہیا، ڄیندی توثیق اقوامِ متحدہ دی سلامتی کونسل دی قرارداد 2803 نال کیتی ڳئی اے۔ نائب وزیراعظم تے وزیرِ خارجہ مسجدِ اقصیٰ/الحرم الشریف اچ اسرائیل دیاں جاری خلاف ورزیاں دی شدید مذمت کیتی۔ انہاں مقبوضہ بیت المقدس دے مشرقی حصے سودھا مغربی کنارے اچ غیر قانونی آبادکاری دیاں سرگرمیاں، آبادکاراں دے تشدد اتے الحاق تے مبنی اقدامات تے وی چنتا کیتے اتے او آئی سی ولوں نویں اتے مربوط سفارتی کارروائی تے زور ݙتا۔ نائب وزیراعظم تے وزیرِ خارجہ غزہ امن منصوبے تے سلامتی کونسل دی قرارداد 2803 تے مکمل اتے خلوص نال عملدرآمد تے زور ݙتے۔ انہاں آکھیا جو غزہ دی تعمیرِ نو تے حکمرانی دے انتظامات فلسطینی قیادت اچ ہووݨے چاہیدن۔ انہاں آکھیا جو موجودہ صورتحال او آئی سی اتے ایںدے رکن ممالک ولوں نویں تے مربوط سفارتی کارروائی دا تقاضا کریندی اے۔ “کمیٹی آف سکس” کوں انہاں ترجیحات کیتے اپݨیاں کوششاں جاری رکھݨیاں چاہیدن، پہلا: مسجدِ اقصیٰ/الحرم الشریف اتے القدس اچ سارے اسلامی و مسیحی مقدس مقاماں دی تاریخی اتے قانونی حیثیت کوں محفوظ بݨاوݨ، ݙوڄھا: مقبوضہ فلسطینی علاقے بشمول مشرقی القدس اچ اسرائیل دی غیر قانونی آبادکاری اچ توسیع، الحاق پسند اقدامات، آبادکاراں دے تشدد اتے جبری بے دخلی کوں مسترد کرݨ، تریڄھا: غزہ امن منصوبے تے سلامتی کونسل دی قرارداد 2803 تے مکمل تے دیانتدارانہ عملدرآمد دی حمایت کرݨ، چوتھا: ایں ڳالھ کوں یقینی بݨاوݨ جو غزہ اچ تعمیرِ نو تے طرزِ حکمرانی دے انتظامات فلسطینی قیادت اچ ہوون اتے فلسطینی اتھارٹی دا مرکزی کردار ہووے، پنجویں نمبر تے: بین الاقوامی قانون تے بین الاقوامی انسانی قانون دیاں خلاف ورزیاں تے احتساب دی حمایت کرݨ، چھیواں: اقوامِ متحدہ اتے ٻئے بین الاقوامی فورمز تے فلسطینی عوام دے تحفظ تے بین الاقوامی قانون دی پاسداری کیتے او آئی سی دے رکن ممالک وچال رابطہ کاری کوں مضبوط بݨاوݨ اتے آخر اچ، ایک قابلِ اعتماد، ناقابلِ واپسی اتے مقررہ مدت دے سیاسی عمل دو مسلسل بین الاقوامی کوششاں کوں برقرار رکھݨ، ڄیندے نتیجے اچ 1967ء توں پہلے دیاں سرحداں دی بنیاد تے ہک آزاد، خودمختار اتے جغرافیائی طور تے قابلِ قبول فلسطینی ریاست دا قیام عمل اچ آوے، ڄیندا دارالحکومت القدس الشریف ہووے ڄݙاں جو اقوامِ متحدہ اچ فلسطین دی مکمل رکنیت دی حمایت وی جاری رکھی ونڄے۔ انہاں آکھیا جو فلسطینی عوام دے نال پاکستان دی یکجہتی ثابت قدم تے غیر متزلزل اے۔