وزیراعظم محمد شہباز شریف نال گیٹس فاؤنڈیشن دے صدر برائے عالمی ترقی کرس ایلیاس دی ملاقات، وزیراعظم دا پولیو دے خاتمے کیتے شراکت داراں دے تعاون نال اقدامات جاری رکھݨ دا عزم

اسلام آباد۔ 28 جنوری (اے پی پی) وزیراعظم محمد شہباز شریف پولیو دے انسداد کیتے شراکت داراں دے تعاون نال اقدامات جاری رکھݨ دے عزم دا اظہار کریندیں ہوئیں آکھیے جو حکومت پولیو دے خاتمے کیتے جامع حکمتِ عملی تے موثر ٹیم دے نال عملی اقدامات کریندی پئی اے۔ وزیراعظم اے ڳالھیں گیٹس فاؤنڈیشن دے صدر برائے عالمی ترقی کرس ایلیاس نال ڳالھ مہاڑ کریندیں ہوئیں کیتا جنھاں بدھ دے ݙینہہ اتھاں وفد دے نال وزیراعظم نال ملاقات کیتی۔ وفد اچ گیٹس فاؤنڈیشن دے صدر کرس ایلیاس دے علاوہ ڈائریکٹر پولیو ڈاکٹر کیتھی نیوزیل تے ڈپٹی ڈائریکٹر پولیو مائیکل گالوے شامل ہن۔ وفاقی وزیر برائے منصوبہ بندی تے ترقی احسن اقبال، وفاقی وزیرِ صحت سید مصطفیٰ کمال، وزیراعظم دی فوکل پرسن برائے انسدادِ پولیو عائشہ رضا فاروق تے ٻئے سرکاری عہدیدار وی ملاقات وچ موجود ہن۔ وزیراعظم آفس دے میڈیا ونگ ولوں جاری بیان دے مطابق، وزیراعظم آکھیے جو پاکستان اچ پولیو دے مکمل سدِ باب تئیں بل گیٹس فاؤنڈیشن سویں قابلِ اعتماد شراکت داراں دے تعاون نال اقدامات جاری رکھیے ویسن۔ انھاں پاکستان توں پولیو دے خاتمے کیتے بل گیٹس دی قابلِ قدر خدمات کوں سراہیا اتے سعودی عرب سمیت ٻئے برادر مسلم ملکاں دے تعاون دا شکریہ ادا کیتا۔ وزیراعظم آکھیے جو وفاقی حکومت موثر حکمتِ عملی دے تحت ملک دے کونے کونے اچ پولیو ٹیماں دی رسائی ممکن بݨاوݨ کیتے صوبیاں دے نال مکمل ہم آہنگی نال کم کریندی پئی اے۔گیٹس فاؤنڈیشن دے صدر کرس ایلیاس آکھیے جو گیٹس فاؤنڈیشن وزیراعظم پاکستان دی انسدادِ پولیو تے ذاتی توجہ تے موثر عملی اقدامات کوں ٻہوں قدر دی نگاہ نال ݙیکھدی اے ۔ پاکستان پولیو دے مکمل خاتمے کیتے تگڑے اقدامات کریندا پئے جیہڑے کامیابی دو ویندے پئن۔ انھاں آکھیے جو پاکستان اچ وفاقی تے صوبائی حکومتاں تے متعلقہ اداریاں نال تعمیری مشورہ جاری رہسی۔ پاکستان اچ پولیو وائرس دی ماحولیاتی موجودگی دے خاتمے تے تمام علاقیاں اچ پولیو ٹیماں دی رسائی کیتے چنگے اقدامات کیتے ڳئن جیہڑے تعریف دے لائق ہن۔کرس ایلیاس پاکستان اچ کامیابی نال جاری انسدادِ پولیو مہم تے مکمل اعتماد دا اظہار کریندے ہوئیں وزیراعظم پاکستان کوں بل گیٹس ولوں نیک خواہشات دا سنیھا وی پڄایا۔وزیراعظم دی فوکل پرسن عائشہ رضا فاروق وی وفد کوں سارے صوبیاں تے شہراں اوچ جاری اقدامات بارے ݙسایا۔ وزیراعظم وفد اچ شامل ڈاکٹر کیتھی نیوزیل کوں انھاں دی نویں تقرری تے مبارکباد ݙتی تے انھاں کیتے نیک خواہشات دا اظہار کیتا۔