مادری زباناں اساݙے ٻالاں دی پہلی آواز تے وراثتی علم و روایت دی بنیادی امین رہندن، صدرِ مملکت آصف علی زرداری

اسلام آباد۔ 21 فروری (اے پی پی)صدرِ مملکت آصف علی زرداری آکھیے جو پاکستان زباناں دے ہک بھرپور تے رنگا رنگ تنوع آلا ملک اے، پنجابی، پشتو، سندھی، بلوچی، سرائیکی، براہوی، ہندکو، شینا، بروشسکی، وخی، ہزارگی تے ٻیاں کئی زباناں اساݙی مشترکہ تاریخ تے ثقافتی رابطیں دی صدیاں تے کھنڈی ہوئی داستان بیان کریندن۔ اردو بطور رابطہ زبان اساݙی وفاقی اکائیاں کوں جوڑیندی اے، تاں جو مادری زباناں اسافے ٻالاں دی پہلی آواز تے وراثتی علم و روایت دی بنیادی امین رہندن۔صدرِ مملکت مادری زباناں دے عالمی ݙینھ وار دے موقع تے اپݨے پیغام وچ آکھیے جو مادری زبان دے عالمی ݙینھ وار دے موقع تے اساں زبان دی اہمیت کوں اجاگر کریندوں کیوں جو ایہو اساݙی سُن٘ڄاݨ، وقار تے بہتر موقعیں دا ذریعہ اے۔ انھاں آکھیا جو زبان صرف اظہار دا ذریعہ کائنی، اے ایں ڳالھ کوں بݨیندی اے جو انسانی برادریاں اپݨے ماضی کوں کیویں یاد رکھیندن، سماجی زندگی کوں کیویں چلیندن تے اپݨے چودھار دی دنیا کوں کیویں سمجھدن۔ زبان اخلاقی روایات، مقامی دانائی تے نسلاں توں منتقل تھیوݨ آلے تجربیں کوں اپݨے اندر سموئے رکھیندی اے۔ انھاں آکھیا جو جݙاں کوئی زبان کمزور تھیندی اے تاں صرف لفظ ہی ضائع کائنی تھیندے بلکہ حقیقت کوں ڈیکھݨ تے سمجھݨ دا ہک خاص زاویہ وی ختم تھیوݨ لڳدے۔صدرِ مملکت آکھیے جو اساݙے جیڑھے کثیر اللسانی وفاق وچ اصل چیلنج تنوع کائنی بلکہ ایں تنوع دے اندر ہم آہنگی کوں ودھاوݨ اے، ایجھی ہم آہنگی جیڑھی ہک رنگا رنگ گلدستہ بݨاوے تے نال ہی ایں مشترکہ ورثے دی حفاظت وی کرے۔ انھاں آکھیا جو کروڑاں پاکستانیاں کیتے زبان عملی طور تے روزمرہ زندگی کوں بݨیندی اے، جیڑھا ٻال گھر وچ ٻولی ونڄݨ آلی زبان وچ تعلیم شروع کریندے، ایندی ذہنی نشوونما بہتر تھیندی اے، او اسباق کوں بہتر سمجھدے، گݨتی سکھدے، اعتماد برقرار رکھیندے تے ایندے وچ تعلیم جاری رکھݨ دے امکانات زیادہ ہوندن۔ ایندے برعکس جݙاں تعلیم صرف ایجھی زبان وچ ݙتی ونڄے جیڑھی خاندان کیتے اجنبی ہووے تاں سکھݨ دا عمل متاثر تھیندے تے شروع دے سالاں وچ سکول چھوڑݨ دی شرح ودھ ویندی اے۔صدرِ مملکت آکھیے جو کسان، کاریگر تے چھوٹے کاروباری لوک عام طور تے منڈیاں تے معلومات تئیں رسائی کیتے مقامی زباناں تے بھروسہ کریندن، ایں کیتے مادری زباناں دی اہمیت کوں منݨ تے انھاں دی سرپرستی کرݨ نہ صرف ثقافتی سُنڄاݨ کوں مضبوط بݨیندے بلکہ پڑھݨ لکھݨ دی صلاحیت تے معاشی شمولیت کوں وی ودھیندے ۔انھاں آکھیا جو مادری زبان تے مبنی تعلیم عقل تے سمجھ کوں بہتر بݨیندی اے تے ٻیاں زباناں سکھݨ وچ مددگار ثابت تھیندی اے۔ صدرِ مملکت آکھیے جو مادری زباناں دا عالمی ݙینھ وار ساری قوماں کوں دعوت ݙیندے جو او لسانی تنوع دی حفاظت کیتے اقدامات کرن۔انھاں آکھیا جو آؤ اڄ دے ݙینہوار اساں عہد کروں جو پاکستان دی ساری مادری زباناں دے احترام تے ودھارے کیتے اپݨے عزم کوں تازہ کریسوں۔ جدید ٹیکنالوجی دے دور وچ کہیں وی زبان کوں ودھاوݨ وچ ہݨ زیادہ مشکل کائنی رہی۔ صدرِ مملکت آکھیا جو اساݙی وحدت ہکو جیہا ہووݨ تے کائنی بلکہ اے سانجھے اعتراف تے برابر دے وقار تے قائم اے۔ اپݨی دھرتی تے ٻولی ونڄݨ آلی زباناں دے تنوع دا احترام کریندے ہوئیں اساں جمہوریت دی بنیاداں مضبوط کریندوں تے ایں ڳالھ کوں یقینی بݨیندوں جو ہر شہری کوں محسوس ہووے جو ایندی ڳالھ سݨی ویندی اے تے اوکوں نمائندگی حاصل اے۔/