پی ٹی آئی دے بانی دی صحت پہلے توں بہتر اے، اڄوکے میڈیکل رپورٹس تسلی بخش ہن ، وفاقی وزیرِ قانون و انصاف

اسلام آباد۔ 24 فروری (اے پی پی) وفاقی وزیرِ قانون تے انصاف اعظم نذیر تارڑ آکھیا جو پی ٹی آئی دے بانی دی صحت پہلے توں بہتر اے اتے اڄوکی میڈیکل رپورٹس تسلی بخش ہن ۔ منگل کوں ایوانِ بالا دے اجلاس اچ انھاں ݙسایا جو مکمل طبی معائنے دے بعد ماہر ڈاکٹراں ای سی جی سمیت مختلف ٹیسٹ کیتن ، جنھاں دی رپورٹ دے مطابق کوئی پیچیدگی سامݨے نئی آئی ۔ انھاں آکھیا جو پروفیسر آف میڈیسن وی طبی معائنہ کیتے اتے سارے عمل پورا تھیوݨ دے بعد انھاں کوں ولا جیل منتقل کر ݙتا ڳئے۔ اعظم نذیر تارڑ آکھیا اے جو ایں معاملے اچ تشویش دی کوئی گالھ کائنی ۔ انھاں واضح کیتا جو کہیں وی قیدی کوں ٻاہر بھیجݨ یا رہا کرݨ عدالت دا کم ۔ چونکہ او ہک سزا یافتہ قیدی ہن، ایندے کیتے انھاں دے مقدمے قانون دے مطابق ٻئے شہریاں وانڳوں سݨے ویسن ۔ انھاں آکھیا جو قانون دی نظر اچ سارے شہری برابر ہن اتے کہیں کوں عہدے دی بنیاد تے رعایت نئی ݙتی ون٘ڄ سگدی۔