وزیر دفاع خواجہ آصف نال معاون خصوصی ہارون اختر خان دی ملاقات

اسلام آباد۔ 25 فروری (اے پی پی) وزیر دفاع خواجہ محمد آصف وزیر اعظم دے خصوصی معاون برائے صنعت و پیداوار ہارون اختر خان نال ملاقات کیتی اے جیندے وچ پاکستان دی معاشی ترقی، برآمدات دے ودھارے تے اڳلے وفاقی بجٹ متعلق امور تے ڳالھ مہاڑ کیتی ۔ وزارت صنعت و پیداوار دی طرفوں جاری بیان دے مطابق ملاقات وچ سیالکوٹ چیمبر آف کامرس اینڈ انڈسٹری دے وفد وی شرکت کیتی اے تے اڳلے بجٹ کیتے اپݨیاں تجاویز تے سفارشات پیش کیتن ۔ ملاقات دے دوران ہارون اختر خان آکھیے جو آوݨ آلا بجٹ صنعت دوست تے کاروبار دوست تھیسی ، جیندا مقصد کاروباری برادری کوں ریلیف تے مراعات ݙیوݨ ہے ۔ انھاں آکھیے جو ٹیکس وچ نرمی تے مراعات متعلق تجویزاں زیرِ غور ہن اے تے حکومت عملی تے ترقی تے مبنی اقدامات کوں بجٹ دا حصہ بݨاوݨ کیتے پرعزم اے۔ انھاں زور ڈتے جو پاکستان دی معاشی ترقی حکومت دی اولین ترجیح اے۔ وزیر اعظم شہباز شریف دی ہدایات موجب ساریاں وزارتاں برآمدات وچ اضافے تے قومی معیشت کوں مستحکم بݨاوݨ کیتے ݙینھ رات کم کریندیاں پئن ۔ ہارون اختر خان مزید آکھیے جو وزیر اعظم دے وژن دے مطابق پاکستان دی تاریخ وچ پہلی وار قومی صنعتی پالیسی تیار کیتی ڳئی اے، جیڑھی پائیدار صنعتی ترقی کیتے ہک جامع فریم ورک ݙیسی ۔ انھاں ݙسایا اے جو سرمایہ کاراں کوں سہولت ݙیوݨ تے ملک وچ کاروبار کرݨ وچ آسانی پیدا کرݨ کیتے ریگولیٹری اصلاحات تے نویاں پالیسیاں مرتب کیتیاں ڳئن ۔ ایں موقع تے خواجہ محمد آصف آکھیے جو صنعتی ترقی دے بغیر مضبوط معیشت دا خواب پورا نی تھی سڳدا اے۔ انھاں ایں ڳالھ تے زور ݙتے جو جݙاں تئیں کاروباری برادری کوں زیادہ توں زیادہ سہولتاں نہ ݙتیاں ویسن ، ملک پائیدار ترقی تے خوشحالی دے پاسے گامزن نی تھی سڳدے ۔ معاون خصوصی یقین ݙیوائے جو تاجراں تے صنعتکاراں دی تجاویز تے آراء کوں بجٹ سازی دے عمل وچ شامل کیتا ویسی تاں جو جامع تے مؤثر معاشی منصوبہ بندی کوں یقینی بݨایا ونڄ سڳے