غیر قانونی امیگریشن دے خلاف پاکستان دی وݙی سفارتی کامیابی، وفاقی وزیرِ داخلہ محسن نقوی دی 3 یورپی ملکاں دے وزرائے داخلہ نال ملاقاتاں، کانفرنس اچ شرکت

روم۔ 26 فروری (اے پی پی) غیر قانونی امیگریشن کوں روکݨ کیتے پاکستان تے یورپی ملکاں وچال اہم ترقی سامݨے آئی اے۔ وفاقی وزیرِ داخلہ محسن نقوی روم اچ اٹلی تے اسپین دے وزرائے داخلہ تے یونان دے وزیرِ مائیگریشن دے نال ہک اہم 4 ملکی کانفرنس اچ شرکت کیتی اے، جیندے اچ انسانی سمگلنگ تے غیر قانونی ہجرت دے خاتمے کیتے وݙے فیصلے کیتے ڳئن ۔ ترجمان وزارتِ داخلہ دے مطابق اٹلی، اسپین تے یونان غیر قانونی امیگریشن اچ 47 فیصد ڳھٹکی کرݨ تے پاکستان دی کوششاں کوں زبردست خراجِ تحسین پیش کیتے ۔ وزیرِ داخلہ محسن نقوی دی تجویز تے ترائیں یورپی ملکاں اتفاق کیتے جو غیر قانونی رستیاں دی بجائے قانونی طریقے کوں ودھا تے انسانی سمگلنگ دا خاتمہ کیتا ویسی۔ چاریں ملکاں غیر قانونی امیگریشن، انسانی سمگلنگ تے منشیات دے خلاف ہک جڑی ہوئی حکمتِ عملی تے سانجھی پالیسی فریم ورک اپناوݨ تے اتفاق کیتے ۔ ملاقات اچ فیصلہ کیتا ڳئے جو سنگین جرائم اچ ملوث مجرماں کوں یورپ توں پاکستان واپس آندا ویسی جتھاں انھاں دے خلاف قانون دے مطابق سخت کارروائی تھیسی ۔ اطالوی وزیرِ داخلہ میٹیو پینٹے ڈوسی تے اسپین دے وزیرِ داخلہ فرنینڈو گرینڈے مارلاسکا محسن نقوی دی قیادت اچ پاکستانی اداریاں دے مثالی ایکشنز کوں سراہیندیں ہوئیں آکھیا جو پاکستان ایں چیلنج نال نبڑݨ کیتے بہترین اقدامات کیتن ۔ یورپی یونین دے ذریعے پاکستان دی صلاحیت ودھاوݨ کیتے بھرپور مدد دا وی یقین ݙوایا ڳئیا۔ وزیرِ داخلہ محسن نقوی دا آکھݨ ہئی اے جو یورپ غیر قانونی امیگریشن توں ساریاں توں ودھ متاثر اے، ایں چیلنج دا خاتمہ صرف ہک سانجھے تے مؤثر نظام دے ذریعے ای ممکن اے۔ اساں مافیا کوں قانون دی پکڑ اچ ڳھن آوݨ کیتے سخت اقدامات کیتن ۔ کانفرنس اچ فیصلہ کیتا ڳیا جو چاریں ملکاں دا اڳلا اجلاس ایں سال پاکستان اچ تھیسی ۔ فوری ردِعمل دے نظام (Rapid Response System) کوں ٻیا بہتر بݨایا ویسی ۔ ݙوپاسہ تعاون تے کوآرڈینیشن کوں تلے دی سطح تک ٹھیک کیتا تھیسی اے۔ ایں اہم ملاقات اچ پاکستانی سفیر علی جاوید، ڈی جی ایف آئی اے ڈاکٹر عثمان انور تے ٻئے اعلیٰ حکام وی شریک ہن۔