پاکستان گورننس فورم معاشی تے اقتصادی حوالے نال اہم سنگِ میل ثابت تھیسی، وفاقی وزیر ڈاکٹر مصدق ملک

اسلام آباد۔ 26 فروری (اے پی پی) وفاقی وزیر موسمیاتی تبدیلی و ماحولیاتی ہم آہنگی ڈاکٹر مصدق ملک آکھیے جو پاکستان گورننس فورم دا انعقاد چنڳا قدم اے، گورننس فورم معاشی تے اقتصادی حوالے نال اہم سنگِ میل ثابت تھیسی، موسمیاتی تبدیلی تے ودھدی ہوئی آبادی وݙے چیلنج ہن، موسمیاتی تبدیلی نال تھیوݨ آلے ضیان توں بچݨ ضروری اے، آبادی دا غیر معمولی اضافہ خوراک جیھے چیلنج پیدا کریندا پئے، حکومت درپیش چیلنجز نال نبٹݨ کیتے پرعزم اے، معیشت کوں مضبوط کرݨ کیتے برآمدات وچ اضافہ یقینی بݨاوݨا پوسی ۔ اے ڳالھ انہاں “پاکستان گورننس فورم 2026” توں خطاب کریندے آکھی۔ وفاقی وزیر ڈاکٹر مصدق ملک آکھیے جو قدرتی آفتاں خاص طور تے چھل پاروں ساݙیاں فصلاں تباہ تھی ویندن تے ساریں توں ودھ ضیان غریب کساناں کوں چاوݨا پوندے۔ انھاں آکھیے جو ہک غریب بندہ جیڑھا ٹھیکے تے زمین گھن تے کاشتکاری کریندے، جݙاں اوندی زمین 7 توں 8 فٹ پاݨی وچ ٻڈ ویندی اے تے جݙاں 4 مہینے بعد پاݨی لہندے تاں اوندے کول ول بج تے کھاد مل گھنݨ کیتے پیسے نی ہوندے ۔ جیڑھی فصل اڳلے کجھ مہینے دے خرچے پورے کرݨ دا ذریعہ بݨدی ہئی، او وی رہ ویندی اے۔ انھاں آکھیے جو ہک چھل توں تھیوݨ آلا ضیان مجموعی قومی پیداوار دا تقریباً 9.8 فیصد تئیں پڄ ویندے تے اے وسائل صرف نقصانات کوں پورا کرݨ تے لڳ ویندن۔ انھاں آکھیے جو اڄوکی آفتاں وچ ہزاراں جاناں ضائع تھیاں، ویہہ ہزار بندے زخمی تھئے، تعلیمی سرگرمیاں متاثر تھیاں تے غربت دی لکیر توں نکلݨ آلے بندے ول غربت وچ چلیے ڳئن۔ ڈاکٹر مصدق ملک آکھیے جو قدرتی آفتاں کوں روکیا نی ونڄ سڳدا پر انھاں دے اثرات کوں گھٹ کرݨ کیتے مؤثر حکمتِ عملی اپنائی ونڄ سڳدی اے، خاص طور تے انھاں طبقیں دے تحفظ کیتے جیڑھے ساریں توں ودھ خطرے وچ ہن، جنھاں وچ غریب خاندان، والدین تے گھٹ عمر ٻال شامل ہن۔انھاں آکھیے جو خطرے دے پہلے توں اطلاع ڈیوݨ آلے نظام (وارننگ سسٹمز)، حفاظتی انتظام تے گلیشیئرز دے حوالے نال اقدامات کوں ایں تناظر وچ ݙیکھݨ دی لوڑھ اے ۔ انھاں آکھیے جو دنیا وچ کاربن دے اخراج پاروں درجہ حرارت وچ ودھارا تھیندا پئے ، جیندے اثرات ساݙے جیھے ملکاں کوں وی بھوڳݨے پوندے پئن ۔ درجہ حرارت ودھݨ نال گلیشیئرز پگھلدن، دریاواں تے ندی نالیں وچ پاݨی دی جاہ گھٹ تھی ویندی اے تے چھل آندی اے ۔انھاں مزید آکھیے جو ساوݨ دے طریقے اچ تبدیلی ، زور دا مینھ وسݨ ، چھل ، سمندری طوفان تے شہری علاقیں وچ بے ہنگم تعمیرات پاروں نال ہیٹ ویوز جیھے مسئلے شدت پکڑیندے پئن۔ مصدق ملک آکھیے جو مختلف قسم دیاں آفتاں دا طریقہ کار انڄ انڄ اے تے انہاں نال نبݨݨ سانڳے ماہرین تے جدید ٹکنالوجی توں فیدہ چاوݨا ضروری اے۔ انھاں آکھیے جو موسمیاتی تبدیلی دے اثرات ساݙی روزمرہ دی زندگی وچ سامݨے آچکئن تے ماحول وچ آوݨ آلی تبدیلیاں مستقبل کیتے سنگین چیلنج بݨدیاں پئن۔