سپریم کورٹ ملک وچ انصاف تئیں رسائی کوں مزید موثر تے ہمہ گیر بݨاوݨ کیتے بار قیادت دے نال مشترکہ اصلاحات دے نویں مرحلے دا آغاز

اسلام آباد۔ 26 فروری (اے پی پی) سپریم کورٹ ملک وچ انصاف تئیں رسائی مزید موثر تے ہمہ گیر بݨاوݨ کیتے بار قیادت دے نال مشترکہ اصلاحات دے نویں مرحلے دا آغاز کر ݙتا ۔ ایں سلسلے وچ چیف جسٹس آف پاکستان جسٹس یحییٰ آفریدی دی صدارت وچ ہک اعلیٰ سطحی مشاورتی اجلاس منعقد تھیا جیندے وچ پاکستان بار کونسل، صوبائی بار کونسلز تے سپریم کورٹ بار ایسوسی ایشن دے نمائندیں شرکت کیتی جتھاں قانونی معاونت، تریمتاں کیتے سہولتاں تے ضلعی سطح تے لیگل ایمپاورمنٹ دے نظام کوں مضبوط بݨاوݨ تے تفصیلی غور کیتا ڳئے۔سپریم کورٹ دے شعبہ تعلقاتِ عامہ دے جاری بیان دے مطابق اجلاس وچ پاکستان بار کونسل دے وائس چیئرمین محمد مسعود چشتی تے چیئرمین ایگزیکٹو کمیٹی منیر احمد ملک، پنجاب بار کونسل دے وائس چیئرمین خواجہ قیصر بٹ، سندھ بار کونسل دے وائس چیئرمین اشتیاق احمد میمن تے چیئرمین ایگزیکٹو کمیٹی ایاز حسین ٹنیو، خیبرپختونخوا بار کونسل دے چیئرمین ایگزیکٹو کمیٹی ملک عماد اعظم، بلوچستان بار کونسل دے وائس چیئرمین جدین دشتی تے چیئرمین ایگزیکٹو کمیٹی ایاز خان مندوخیل، اسلام آباد بار کونسل دے وائس چیئرمین چوہدری آصف عرفان تے چیئرمین ایگزیکٹو کمیٹی محمد ظفر کھوکھر جݙاں جو سپریم کورٹ بار ایسوسی ایشن دے جنرل سیکرٹری ملک زاہد اسلم اعوان ورچوئل شرکت کیتی اے۔ ایں موقع تے سپریم کورٹ بار ایسوسی ایشن دے صدر ہارون الرشید تے لاء اینڈ جسٹس کمیشن آف پاکستان دے سیکرٹری وی موجود ہن۔اجلاس وچ ضلعی لیگل ایمپاورمنٹ کمیٹیز (DLECs) کوں موثر بݨاوݨ، منظم تے مربوط مفت قانونی معاونت دی توسیع تے عدالتی نظام کوں شہری دوست تے جامع بݨاوݨ کیتے ویمن فیسلیٹیشن سینٹرز کوں ادارہ جاتی شکل ڈیوݨ تے تفصیلی غور کیتا ڳیا، بالخصوص تریمتاں، کمزور طبقیں تے پسماندہ برادریاں دی سہولت دے حوالے نال اے۔ چیف جسٹس آف پاکستان شرکا کوں 2025-26 دے اصلاحاتی ایجنڈے توں آگاہ کیتا جیندے تحت چار ترجیحی شعبیں کیتے ملک وچ فنڈز مختص کیتے ڳئن، جنھاں وچ عدالتی عمارتاں دی سولرائزیشن، ای لائبریریاں دا قیام، تریمتاں کیتے مخصوص سہولتی جہیں دی ترقی، تے صاف پیوݨ دا پاݨی شامل اے۔ اے سہولتاں بینچ تے بار ݙوہیں کوں ݙتیاں ویندیاں پئن تے انھاں دی تکمیل اگست 2026 دے اخیر تئیں متوقع اے۔سال 2026-27 کیتے اصلاحاتی حکمتِ عملی وچ ملک بھر دے عدالتی کمپلیکسز وچ ویمن فیسلیٹیشن سینٹرز دی اپ گریڈیشن تے استحکام کوں ترجیح ݙتی ویسی جینکوں بار نمائندیں متفقہ طور چنڳاں آکھیے ۔ اجلاس وچ ایں ڳالھ تے وی اتفاق کیتا ڳیا جو بار کونسلز ولوں ݙتی ونڄݨ آلی مفت قانونی معاونت کوں ضلعی لیگل ایمپاورمنٹ کمیٹیز دے نال مربوط کیتا ویسی تاں جو ہم آہنگی، صلاحیت تے رسائی کوں بہتر بݨایا ونڄ سڳے ۔ایں سلسلے وچ سپریم کورٹ آف پاکستان وچ ہک خصوصی ہیلپ لائن قائم کیتی ویسی جتھاں بار کونسلز ولوں نامزد پروبونو وکلاء ہک منظم کال بیسڈ نظام دے تحت قانونی رہنمائی فراہم کریسن ۔ مجوزہ فریم ورک بار کونسلز توں مشاورت کیتے شیئر کیتا ویسی۔پیشہ ورانہ تربیت دے حوالے نال چیف جسٹس ݙسایا جو فیڈرل جوڈیشل اکیڈمی ولوں نوجوان وکلاء دی صلاحیتاں وچ اضافے کیتے ڈس ماڈیولز تے مبنی آن لائن بار ووکیشنل کورس تیار کیتا ویندا پئے جیڑھا مئی 2026 دے پہلے ہفتے وچ آن لائن دستیاب تھیسی ۔ مزید اے جو مختلف قانونی شعبیں وچ قوانین دے جائزے کیتے بار دی نمائندگی دے نال مشاورتی کمیٹیاں بݨا ݙتیاں ڳئن تا جو جامع، مشاورتی تے مستقبل موجب قانون سازی کوں ودھایا ونڄ سڳے۔ اجلاس ایں عزم دا اعادہ کیتا جو بینچ تے بار سانجھے تعاون نال انصاف تئیں رسائی، قانونی بااختیاری، تے ہک مؤثر، خودمختار تے جامع نظامِ انصاف دے قیام کیتے کٹھے کم جاری رکھیسن۔