دفترِ خارجہ دے ترجمان طاہر حسین اندرابی دی ہفتہ وار پریس بریفنگ

اسلام آباد۔ 26 فروری (اے پی پی) دفترِ خارجہ دے ترجمان طاہر حسین اندرابی آکھیے جو بلوچستان وچ اڄوکے دہشت گرد حملے دے بعد بھارت دی وزارتِ خارجہ ولوں آوݨ آلا ردعمل دراصل پاکستان دے ایں موقف دی توثیق کریندے جو ملک وچ عدم استحکام دی سرگرمیاں وچ ٻاہرلے عناصر ملوث ہن ۔ اتھاں ہفتہ وار پریس بریفنگ توں خطاب کریندے ترجمان خطے وچ امن، مکالمے تے سفارت کاری کیتے پاکستان دے عزم دا اعادہ کیتا تے قومی مفادات و بین الاقوامی جھیڑے تے پاکستان دے اصولی موقف کوں وی دہرائے۔ترجمان یاد ݙیوائے جو ایں مہینے سمجھوتہ ایکسپریس بم حملے دی 19 ویں برسی منائی ویندی پئی اے جیندے وچ 70 توں زیادہ قیمتی جاناں ضائع تھیاں ہن ۔ انھاں آکھیا جو ایں حملے وچ ملوث للوکاں وچوں ہک آسید آنند سرعام اپݨے جرم دا اعتراف کیتا ہئی جݙاں جو بھارتی کرنل سری کانت پروہت وی اپݨے کردار دا اقرار کیتا ہئی پر سمجھوتہ ایکسپریس کیس دے چارے ملزم ہݨ تئیں آزاد ہن ۔ طاہر حسین اندرابی آکھیا جو بھارت ایں حملے وچ ملوث لوکاں کوں انصاف دی کچاری وچ گھن آوݨ وچ ناکام رہیے۔ انھاں بھارتی وزارتِ خارجہ دے اڄوکے بیان کوں بے بنیاد قرار ݙیندے مسترد کرݙتے۔دفترِ خارجہ دے ترجمان وزیراعظم محمد شہباز شریف دے اڄوکے دورہ قطر دا وی ذکر کیتا، مقبوضہ مغربی کنارے دی صورتحال تے پاکستان دے موقف کوں دہرایا تے سمجھوتہ ایکسپریس حملے دی برسی دا حوالہ ݙتا ۔ انھاں آکھیا جو وزیراعظم امیرِ قطر دی دعوت تے 23 توں 24 فروری تئیں دوحہ دا دورہ کیتے۔ انھاں آکھیا جو ملاقات دے دوران ݙوہیں لیڈراں ݙوطرفہ تعلقات دے سارے پہلواں دا جائزہ ڳھدا تے سیاسی رابطیں دی مثبت ترقی تے اطمینان دا اظہار کیتے۔ انھاں تجارت، سرمایہ کاری تے اقتصادی تعاون سودھے سانجھی دلچسپی دے سارے شعبیں وچ تعاون ودھاوݨ دی اہمیت تے زور ݙتا۔ترجمان آکھیا جو امیرِ قطر پاکستان دے نال اقتصادی شراکت داری کوں مزید سٹریٹجک سطح تئیں ودھاوݨ دے عزم دا اعادہ کیتا جݙاں جو ݙوہیں لیڈراں علاقائی و عالمی معاملیں تے وی ڳالھ مہاڑ کیتی تے جھیڑیں دے پرامن حل، مکالمے تے سفارت کاری دی اہمیت تے زور ݙتے۔ انھاں آکھیا جو امیرِ قطر وزیراعظم ولوں ایں سال پاکستان دے دورے دی دعوت قبول کر ڳھدی اے۔طاہر حسین اندرابی آکھیا جو نائب وزیراعظم تے وزیرِخارجہ محمد اسحاق ڈار 26 توں 28 فروری تئیں سعودی عرب دے سرکاری دورے تے ہن جتھاں او جدہ وچ او آئی سی دی ایگزیکٹو کمیٹی دے غیر معمولی وزارتی اجلاس وچ شرکت کریسن، اے ہنگامی اجلاس اسرائیلی قابض حکام دے انھاں اقدامات تے غور کیتے سݙیا ڳئے جنھاں کوں پاکستان غیر قانونی قرار ݙتے جنھاں وچ یہودی وستیاں دی توسیع تے مقبوضہ مغربی کنارے تے اسرائیلی قبضے دے اقدامات شامل ہن۔ وزارتی اجلاس وچ سینیٹر محمد اسحاق ڈار مقبوضہ مغربی کنارے دے علاقیں کوں نام نہاد “ریاستی زمین” وچ بدلݨ دے اسرائیلی اقدامات تے پاکستان دا موقف پیش کریسن ۔اجلاس دے موقع تے انھاں دی او آئی سی دے رکن ملکاں دے وزرائے خارجہ نال ݙوطرفہ ملاقاتاں وی متوقع ہن ۔ ترجمان آکھیا جو پاکستان او آئی سی دے رکن ملکاں تے ٻئے ملکاں نال مشترکہ بیانات وچ اڄوکے اسرائیلی اقدامات دی شدید مذمت کیتی اے تے انھاں کوں بین الاقوامی قانون دی خلاف ورزی تے علاقائی امن و استحکام کیتے خطرہ قرار ݙتے۔