آرمی چیف تے چیف آف ڈیفنس سٹاف فیلڈ مارشل سید عاصم منیر، نیول چیف تے ایئر چیف دا آپریشن سوئفٹ ریٹارٹ دے 7 سال مکمل تھیوݨ تے مسلح افواج دے افسراں تے جواناں دی جرأت کوں خراجِ تحسین

راولپنڈی۔ 27 فروری (اے پی پی) چیف آف آرمی سٹاف تے چیف آف ڈیفنس سٹاف فیلڈ مارشل سید عاصم منیر، چیف آف دی نیول سٹاف ایڈمرل نوید اشرف تے چیف آف ایئر سٹاف ایئر چیف مارشل ظہیر احمد بابر سدھو پاکستان دی مسلح افواج ولوں آپریشن سوئفٹ ریٹارٹ دے 7 سال مکمل تھیوݨ تے افسران تے جواناں دے عزم، جرأت، پیشہ ورانہ مہارت تے قربانیاں کوں سراہیندیں ہوئیں انہاں کوں خراجِ تحسین پیش کیتے۔ پاک فوج دے شعبہ تعلقات عامہ (آئی ایس پی آر) دے مطابق 27 فروری 2019ء کوں شروع کیتا ونڄݨ آلا آپریشن سوئفٹ ریٹارٹ بھارت دی بلا اشتعال جارحیت دے جواب اچ ہک مؤثر تے فیصلہ کن کارروائی ہئی جئیں پاکستان دے عزم کوں ݙو ٹوک انداز اچ واضح کیتا جو او آپݨی خودمختاری دے تحفظ کیتے ہر ممکن اقدام کریسی۔ بیان وچ آکھیا گیا جو ایں آپریشن مسلح افواج دی پیشہ ورانہ صلاحیت، تیاری تے آپریشنل برتری کوں نمایاں کیتا جیندے نتیجے اچ ٻئی کشیدگی دا سدِ باب تھیا اتے خطے اچ تزویراتی توازن بحال تھیا۔ فیلڈ مارشل تے سروسز چیفس ایں موقع تے قومی سلامتی تے علاقائی امن کیتے آپݨے غیر متزلزل عزم دا اعادہ کریندیں ہوئیں آکھیا جو پاکستان دی مسلح افواج ہر قسم دے خطرات دا مقابلہ کرݨ کیتے مکمل طور تے تیار ہن۔ انہاں ایں ڳالھ تے وی زور ݙتا جو افواجِ پاکستان ملک دے دفاع کوں یقینی بݨاوݨ دے نال نال عالمی امن تے استحکام اچ وی فعال کردار ادا کریندی رہسی۔