کوئی ایں غلط فہمی اچ نہ رہوے جو پاکستان دباؤ یا دھمکی توں ݙرسی، اساݙی مسلح افواج دی جوابی صلاحیت ہمہ گیر تے بروقت اے، صدرِ مملکت

اسلام آباد۔ 27 فروری (اے پی پی) صدرِ مملکت آصف علی زرداری واضح کیتے جو کوئی ایں غلط فہمی اچ نہ رہوے جو پاکستان دباؤ یا دھمکی توں ݙر ویسی، اساݙی مسلح افواج دی جوابی صلاحیت ہمہ گیر، بروقت اتے فیصلہ کن اے اتے او دشمن دے ناپاک عزائم کوں منڈھوں پٹݨ دی پوری استعداد رکھیندن۔ جمعہ کوں ایوانِ صدر دے پریس ونگ توں جاری بیان دے مطابق صدرِ مملکت آکھیا جو اڄ پاکستان دی باوقار قوم تے اساݙی دلیر مسلح افواج وطن دی سالمیت تے سرحداں دے تحفظ کیتے سیسہ پلائی دیوار وانڳوں کھڑن۔ ریاستِ پاکستان امن، استحکام تے علاقائی سالمیت تے کہیں قسم دا سمجھوتہ نہ کریسی، کہیں کوں اے غلط فہمی نہ ہووݨی چاہیدی جو پاکستان دباؤ یا دھمکی توں مرعوب تھیسی۔ صدرِ مملکت آکھیا جو اساݙی مسلح افواج دی جوابی صلاحیت ہمہ گیر، بروقت تے فیصلہ کن اے اتے او دشمن دے ناپاک عزائم کوں منڈھوں پٹݨ دی بھرپور استعداد رکھیندی اے، اساں تصادم نئی چاہندے، پر اگر کہیں پاکستان دے امن کوں کمزوری سمجھیا تاں اونکوں سخت جواب ملسی۔ پاکستان کوں بخوبی پتہ اے جو تشدد دے منصوبہ ساز، سہولت کار تے سرپرست کتھاں بیٹھن، اگر خونریزی دا سلسلہ جاری رہیا تاں ذمہ دار عناصر اساݙی رسائی توں باہر نہ ہوسن۔