پاکستان ہک ذمہ وار ملک اے جیڑھا عزت نال امن چاہندے، سربراہ پاک فضائیہ

اسلام آباد۔ 27 فروری(اے پی پی) سربراہ پاک فضائیہ ایئر چیف مارشل ظہیر احمد بابر سدھو ایئر ہیڈ کوارٹرز وچ آپریشن سوئفٹ ریٹارٹ دی ستویں سالڳںڈھ دی تقریب نال خطاب کریندے آکھیے پاکستان ہک ذمہ وار ملک اے جیڑھا عزت نال امن چاہندے۔ سربراہ پاک فضائیہ مزید آکھیے جو ست سال پہلے دشمن پاکستان دی خودمختاری کوں چیلنج کیتا تے ہمیشہ وانڳوں کوڑے بیانیے تے مبنی اپݨے اندازے وچ ساݙی صلاحیت تے عزم دا غلط اندازہ لاتا۔ انہاں آکھیا جو دشمن ساݙے پختہ عزم، جذبہ قربانی تے بے مثال حوصلے توں بے خبر تھی تے رات دے اندھارے اچ بزدلانہ حملہ آور تھیا۔ ایئر چیف آکھیا ݙینھ دی روشنی وچ نپی تلی تے مؤثر کارروائی دے ذریعے اساں عددی برتری رکھݨ آلے دشمن دے خلاف اپݨی دفاعی قوت دا مظاہرہ کیتا۔ سربراہ پاک فضائیہ آکھیا جو پیچیدہ عالمی و علاقائی ماحول تے جنگ دے تکھے بدلدے رجحانات دے پیشِ نظر، مالی اوکھ دے باوجود پی اے ایف مارچ 2021 توں ہک جامع جدت طرازی تے مقامی سطح تے تیاری دے سفر دا آغاز کیتا تے اونکوں بھرپور انداز وچ جاری رکھیا تاں جو پاک فضائیہ کوں نیکسٹ جنریشن ایئر فورس وچ تبدیل کیتا ونڄ سڳے۔ انہاں ایں ڳالھ تے زور ݙتا جو پی اے ایف جدید جنگ دے تقاضیں کوں پورا کرݨ کیتے اپݨی آپریشنل ڈاکٹرائن کوں فوری طور تے ازسرِ نو ترتیب ݙتا تے گھٹ توں گھٹ وقت وچ جدید ترین حربی تے معاون صلاحیتاں دے نال نال خصوصی نوعیت دی ٹیکنالوجیز کوں شامل تے فعال کیتا۔ ایئر چیف مزید آکھیا پی اے ایف ریکارڈ ویلھے وچ مقامی طور تے تیار کیتے ڳئے بغیر پائلٹ فضائی نظام، الیکٹرانک وارفیئر، خلائی تے سائبر وسائل دے استعمال نال ہک منفرد مقامی کل چین تیار کیتی جیندے نتیجے وچ مربوط کثیر جہتی آپریشنل صلاحیتاں مضبوط تھیاں۔ معرکہ حق دے دوران پاک فضائیہ دے جامع تے متوازن ردعمل کوں اجاگر کریندے ایئر چیف آکھیا، جݙاں مئی 2025 دے ابتدائی لمحات وچ جارح دشمن ہک واری ول ساݙی خودمختاری کوں چیلنج کیتا تاں ساݙا جواب دشمن دی توقعات توں کتھائیں زیادہ حیران کن ہئی۔ انہاں آکھیا تاریخ وچ پہلی واری پی اے ایف مکمل دائرہ کار تے مبنی کثیر جہتی آپریشنز انجام ݙتے جیڑھے نہایت منظم تے بے نقص طریقے نال مکمل کیتے ڳئے، جیندے نتیجے وچ دشمن کوں فیصلہ کن شکست تھئی تے اوندے کئی جدید ترین پلیٹ فارمز، جنہیں وچ ڈھیر سارے رافیل طیارے، ایس یو-30 ایم کے آئی، میراج-2000، مگ-29 تے بغیر پائلٹ فضائی نظام شامل ہن، مار ڈھائے ڳئے۔ ایئر چیف ݙسایا پاک فضائیہ دشمن دے علاقے دے اندر گہرائی تئیں ونڄ تے بیسز تے زمینی اثاثیں کوں وی نشانہ بݨایا جݙاں جو جدید ترین ایس-400 فضائی دفاعی نظام تے انھاں دے کمانڈ اینڈ کنٹرول سینٹر کوں وی ناکارہ بݨایا۔ چھیکڑ اچ سربراہ پاک فضائیہ ایں عزم دا اعادہ کیتا پاکستان ایئر فورس اپݨے بہادر تے ثابت قدم عوام دی توقعات تے پوری لہسی تے ہمیشہ ایں عظیم قوم کیتے فخر دی علامت بݨی رہسی۔ پاک فضائیہ قوم دے نال رل تے آپریشن سوئفٹ ریٹارٹ دی ستویں سالڳنڈھ منائی جیڑھی جدید فضائی جنگ وچ عزم، پیشہ ورانہ مہارت تے متوازن ردعمل دی ہک نمایاں مثال اے۔ اے ݙینھ پی اے ایف دے دلیر فضائی جانباز پاکستان دی خودمختاری دے تحفظ تے مادرِ وطن دے مضبوط و قابلِ اعتماد فضائی دفاع کوں یقینی بݨاوݨ دے اپݨے غیر متزلزل عزم دی تجدید کریندن۔ آپریشن سوئفٹ ریٹارٹ قومی اتحاد، پیشہ ورانہ برتری تے قابلِ اعتماد دفاعی صلاحیت دی علامت اے۔ پاکستان دی مسلح افواج تے ثابت قدم قوم وچال ہم آہنگی ملک دے امن، استحکام تے محتاط پر ذمہ دارانہ دفاعی موقف دی ضامن اے۔