آئی جی پنجاب دا صوبے وچ سکیورٹی ہائی الرٹ کرݨ دا حکم

لاہور۔ 27 فروری (اے پی پی) انسپکٹر جنرل پنجاب عبدالکریم مسیتاں ، عبادت گاہواں، مارکیٹاں تے اہم تنصیبات دی سکیورٹی ہائی الرٹ کرݨ دا حکم ݙے ݙتا۔ آئی جی پنجاب دی زیرِ صدارت سکیورٹی انتظامات دا جائزہ گھنݨ کیتے ویڈیو لنک اجلاس منعقد تھیا، جیندے وچ لاہور تے راولپنڈی سودھے صوبے دی سکیورٹی ودھاوݨ دا فیصلہ کیتا ڳئے۔ آئی جی پنجاب آر پی اوز، سی پی اوز تے ڈی پی اوز کوں ہدایت کیتی جو او مسیتاں ، عبادت گاہواں تے اہم تنصیبات دی سکیورٹی دا خود جائزہ گھنن تے سکیورٹی انتظامات کوں مزید موثر بݨاون۔ بین الصوبائی پولیس چیک پوسٹاں، پولیس اسٹیشنز و دفتراں تے ٻئے قانون نافذ کرݨ آلے اداریں دی عمارات دی سکیورٹی وی ودھاوݨ دی ہدایت کیتی ڳئی۔ آئی جی پنجاب عبدالکریم چینی ماہرین و لوکاں سودھے ٻئے غیر ملکی شہریاں دی رہائش گاہواں، ورک پلیسز تے نقل و حرکت دے دوران فول پروف سکیورٹی یقینی بݨاوݨ تے زور ݙتا۔ انہاں ہدایت کیتی جو پولیس افسران، سپیشل برانچ تے ٻئی سکیورٹی ایجنسیاں دی مشاورت نال جامع سکیورٹی آرڈر تشکیل ݙتا ونجے۔ آئی جی پنجاب افغان سودھے غیر قانونی رہݨ آلے سارے غیر ملکی لوکاں تے تارکین وطن دے انخلا دی مہم کوں تکھا کرݨ دی ہدایت کیتی ۔ انٹیلی جنس بیسڈ، سویپ اینڈ کومبنگ آپریشنز دا دائرہ کار بین الصوبائی سرحدی علاقیں تئیں ودھاوݨ دا حکم ݙتا ڳیا۔  حکومت پنجاب دی طرفوں ڈرون دے استعمال تے نافذ دفعہ 144 تے سختی نال عملدرآمد یقینی بݨاوݨ دا وی حکم ݙتا ڳیا۔ ویڈیو لنک اجلاس وچ سی سی پی او لاہور، ایڈیشنل آئی جی ساؤتھ پنجاب، ایڈیشنل آئی جی سی ٹی ڈی، ایڈیشنل آئی جی سپیشل برانچ، سارے آر پی اوز، سی پی اوز تے ڈی پی اوز شرکت کیتی جݙاں جو ایڈیشنل آئی جی پی ایچ پی فیصل علی راجہ، ڈی آئی جی آئی ٹی منصور الحق، اے آئی جی آپریشنز، اے آئی جی ڈویلپمنٹ تے اے آئی جی ایڈمن وی اجلاس وچ موجود ہن۔