وزیراعلیٰ مریم نواز دا آپریشن ’’غضب للحق‘‘ دی فیصلہ کن کارروائی تے مسلح افواج کوں خراجِ تحسین

لاہور۔ 27 فروری (اے پی پی) وزیراعلیٰ پنجاب مریم نواز پاک فوج دے آپریشن ’’غضب للحق‘‘ دی فیصلہ کن کارروائی کوں پوری قوم دے جذبات دی ترجمانی قرار ݙیندے مسلح افواج کوں زبردست خراجِ تحسین پیش کیتے۔ وزیراعلیٰ اپݨے بیان وچ آکھیے جو اے آپریشن خوارج کیتے واضح پیغام اے جو پاکستان دے صبر دا پیمانہ لبریز تھی چکئے۔ انہاں آکھیا پاکستان دیاں سرحداں آہنی دیوار ہن، ٹکراوݨ آلا ہر فتنہ پاش پاش تھیسی۔ مریم نواز شہدا کوں یاد کریندے عزم ظاہر کیتا جو انھاں دے خون دے ہک ہک قطرے دا حساب ڳھدا ویسی۔ انہاں ݙو ٹوک الفاظ وچ آکھیا جو پاکستان تے جیڑھی میلی اکھ اٹھسی، نوچ ڳھدی ویسی تے جیڑھا ہتھ اُٹھسی، بھن ݙتا ویسی۔ وزیراعلیٰ غازیاں کوں سلام پیش کریندے آکھیے انھاں ثابت کر ݙتے پاکستان دیاں سرحداں ناقابلِ عبور ہن، مستقبل وچ دشمن کوں اوں زبان وچ جواب ݙتا ویسی جیڑھی اونکوں سمجھ آندی اے۔ انہاں اپݨے بیان دا اختتام ایں یقین تے کیتا جو پاکستان ناقابلِ تسخیر ہائی، ہے تے ہمیشہ رہسی۔