صدرِمملکت آصف علی زرداری دے پارلیمنٹ دے مشترکہ اجلاس توں خطاب دے بعد تریجھے پارلیمانی سال دا باقاعدہ آغاز

اسلام آباد۔ 2 مارچ (اے پی پی) صدرِ مملکت آصف علی زرداری دے پارلیمنٹ دے مشترکہ اجلاس توں خطاب دے بعد موجودہ حکومت دے تریجھے پارلیمانی سال دا باقاعدہ آغاز تھی ڳئے۔ موجودہ قومی اسمبلی دے یکم مارچ 2025ء توں شروع تھیوݨ آلے ݙوجھے پارلیمانی سال دے دوران قانون سازی اچ نمایاں تیزی ݙیکھݨ اچ آئی اے، ݙوجھے پارلیمانی سال دے چھیکڑی مہینے اچ 12 فروری 2026ء تئیں 27 ویں آئینی ترمیم سودھے 46 مختلف سرکاری ٻلز منظور کیتے ڳئے جݙاں جو ایں دورانیے دے دوران ممبران دی طرفوں پیش کیتے ڳئے 13 نجی ٻلز وی منظور تھئے، ݙوجھے پارلیمانی سال دا اختتام 28 فروری 2026ء کوں تھیا۔ ایں دوران 27 ویں آئینی ترمیم ٻل 2025، پاکستان آرمی ترمیمی ٻل 2025، پاکستان ایئر فورس ترمیمی ٻل 2025، پاکستان نیوی ترمیمی ٻل 2025، سپریم کورٹ پریکٹس اینڈ پروسیجر ترمیمی ٻل 2025، آسان کاروبار ٻل 2025، نیشنل سکول آف پبلک پالیسی ٻل 2025، انسداد دہشت گردی ترمیمی ٻل 2025، پٹرولیم ترمیمی ٻل 2025، پاکستان لینڈ پورٹ اتھارٹی ٻل 2025، پاکستان سوسائٹیز رجسٹریشن ترمیمی ٻل 2025، فوجداری قوانین ترمیمی ٻل 2025 تے ٻئے ٻلز منظور تھئے۔ تریجھے پارلیمانی سال دے آغاز تے سیاسی ماہرین دا آکھݨ اے جو ہݨ حکومت دی توجہ انھاں قوانین دے ثمرات عام آدمی تئیں پڄاوݨ تے معاشی استحکام کیتے مزید قانون سازی تے مرکوز رہسی۔