بھارت جنگی میداناں توں بامعنی مذاکرات آلے پاسے آوے نتاں ذلت آمیز شکست کیتے تیار رہے، پاکستان پہلے ہی بھارت تے افغانستان کوں آپݨی صلاحیتاں دی جھلک ݙکھا چکئے، صدرِ مملکت آصف علی زرداری دا نویں پارلیمانی سال دے آغاز تے پارلیمنٹ دے مشترکہ اجلاس توں خطاب

اسلام آباد۔ 2 مارچ (اے پی پی) صدرِ مملکت آصف علی زرداری جنگ کوں چھیکڑی حل قرار ݙیندے بھارت تے زور ݙتے جو او جنگی میداناں توں بامعنی مذاکرات دے پاسے آوے نتاں ہک ٻئی ذلت و توہین آمیز شکست کیتے تیار رہے، صدرِ مملکت خبردار کیتا جو پاکستان پہلے ہی بھارت تے افغانستان کوں آپݨی صلاحیتاں دی محض ہک جھلک ݙکھا چکئے، نویں پارلیمانی سال دے آغاز تے خود مختاری دا تحفظ، دہشت گردی دا خاتمہ تے معاشی استحکام کوں مزید مضبوط بݨاوݨ ساݙی ترجیحات ہووݨی چاہیدن۔ نویں پارلیمانی سال دے آغاز تے پارلیمنٹ دے مشترکہ اجلاس توں آپݨے سالانہ خطاب اچ صدرِ مملکت آکھیا جو انھاں کوں اے اعزاز حاصل اے جو بحیثیت ݙو واری منتخب صدر انھاں نے نویں پارلیمانی سال دے آغاز تے ایں معزز ایوان توں نوویں واری خطاب کیتا، ہر خطاب ساݙے جمہوری نظام دے تسلسل تے پاکستان دے عوام دے نمائندیں دی حیثیت نال ساݙی ذمہ واریاں دی یاد دہانی اے۔صدرِ مملکت آکھیا جو قوماں دا امتحان صرف بحراناں اچ نی بلکہ اہم موڑ تے وی تھیندے، گزریل سال ساکوں یاد ݙیوایا جو ساݙی جمہوریت دی طاقت آئین، عوام دی استقامت، پارلیمنٹ و حکومت دی ذمہ واریاں تے ساݙی مسلح افواج دے حوصلے اچ لُکی ہوئی اے، نویں پارلیمانی سال دے آغاز تے اساکوں ایں استقامت کوں بنیاد بݨا تے آپݨی خود مختاری دا تحفظ، آئینی حکمرانی کوں مضبوط تے معاشی تبدیلی کوں اڳوں ودھاوݨا ہوسی تاں جو استحکام ترقی اچ ڈھل تے ہر شہری کیتے خوشحالی، ترقی تے امن دا ذریعہ بݨے۔صدرِ مملکت آکھیا جو اڄ اساں انھاں بنیاداں تے کھڑے تھیسوں جیڑھیاں ساݙی قومی تاریخ دے معماراں رکھیاں، قائداعظم محمد علی جناح آئین تے قانون دی حکمرانی تے مبنی جمہوری ریاست دا تصور پیش کیتا، شہید ذوالفقار علی بھٹو قوم کوں متفقہ آئین ݙتا، شہید محترمہ بینظیر بھٹو آپݨی قربانی تے مثالی قیادت دے ذریعے جمہوری عمل کوں مضبوط کیتا۔ صدرِ مملکت آکھیا جو پارلیمنٹ دی بالادستی تے انھاں دا یقین صرف لفظاں تئیں محدود کائنی بلکہ عملی اقدامات توں ظاہر اے، آپݨے سابقہ دورِ صدارت اچ میں یکطرفہ طور تے او اختیارات پارلیمنٹ کوں واپس کیتے جیڑھے 1973ء دے آئین دے موجب ہن ۔ تاریخی اٹھارویں ترمیم دے ذریعے اڄ ایوانِ صدر وفاق دی وحدت دی علامت، وفاقی اکائیاں وچال پل تے آئینی قوانین دا محافظ اے۔صدرِ مملکت آکھیا جو گزریل ݙاہ مہینے قوم کیتے گہرے تے پیچیدہ امتحان دا سبب بݨئے، جݙاں وی ساݙی خود مختاری کوں مشرقی یا مغربی سرحد تے چیلنج کیتا ڳیا، پاکستان حکمت، تحمل تے پختہ عزم دے نال جواب ݙتا۔ بلا اشتعال حملیں دے جواب اچ ساݙی مسلح افواج غیر معمولی پیشہ ورانہ مہارت تے نظم و ضبط دا مظاہرہ کیتا، معرکۂ حق اچ ساݙی مسلح افواج بھارت دے حملے کوں ہک تاریخی تزویراتی فتح اچ بدل ݙتا، مغربی سرحد تے جݙاں 26 فروری دی رات طالبان حکومت دی طرفوں حملیں دا سلسلہ ودھایا ڳیا تاں ساݙی سکیورٹی فورسز بھرپور کارروائی کریندے واضح پیغام ݙتا جو ساݙی خود مختار سرزمین تے کہیں وی دراندازی کوں ہرگز برداشت کائناں کیتا ویسی، سیاسی قیادت متحد رہی، عوام ثابت قدم رہیے، میں آغاز اچ ہی آپݨی قوم دے جانباز محافظاں دا تہہ دل توں شکریہ ادا کرینداں۔ انھاں دی بدولت اساں سارے اڄ محفوظ ہیسے، انھاں کامیاب عسکری معرکیں اچ،بھاویں او مختصر ہوون یا طویل، ساݙی فوج، فضائیہ، بحریہ، رینجرز، فرنٹیئر کور، پولیس تے انٹیلی جنس اداریں دی قربانیاں کوں صرف اعداد و شمار تئیں محدود کائنی کیتا ونڄ سڳدا۔ ہر شہید ہک ایہوجیہا خاندان چھوڑیندے جیں پاکستان دے استحکام کیتے عظیم قربانی ݙتی۔صدرِ مملکت آکھیا جو جݙاں او شہداء دے خانداناں نال ملدن تاں انھاں کوں وہی درد محسوس تھیندے جیڑھا انھاں آپݨی اہلیہ شہید محترمہ بینظیر بھٹو دی شہادت دے ویلھے محسوس کیتا ہئی، ریاست دی ذمہ واری اے جو او انھاں خانداناں دی عزت و وقار دے نال کفالت جاری رکھے، 2025ء پاکستان کیتے ہک اہم موڑ ثابت تھیا جݙاں معرکۂ حق اچ شاندار عسکری کامیابی ٻاہرلی جارحیت کوں پچھوں ہٹایا تے روایتی برتری دے تاثر کوں تروڑ ݙتا۔ اے صرف فوجی کامیابی کائناں ہئی بلکہ قومی عزم دا اظہار ہئی۔ اساں نہ صرف عسکری بلکہ سفارتی محاذ تے وی کامیابی حاصل کیتی۔صدرِ مملکت واضح کیتا جو پاکستان جموں و کشمیر دے عوام دے منصفانہ حقِ خودارادیت دی مکمل سفارتی تے اخلاقی حمایت جاری رکھیسی، جنوبی ایشیا اوں ویلھے تئیں مکمل امن نی تھی سڳدا جݙاں تئیں کشمیری عوام آزادی حاصل نہ کر گھنن، جے کوئی جارحیت مسلط کیتی ڳئی تاں اونکوں ہک ٻئی ذلت آمیز شکست کیتے تیار رہݨا چاہیدے، تاں جو میݙا مشورہ اے جو جنگ دے بجائے مذاکرات دی میز دا راستہ اختیار کیتا ونڄے کیوں جو ایہو ہی علاقائی سلامتی دا واحد رستہ اے۔صدرِ مملکت آکھیا جو پاکستان ہک ذمہ وار ایٹمی ریاست اے، اساں آپݨی ذمہ واریاں توں آگاہ ہیسے، مگر لوڑھ پووݨ تے آپݨے دفاع دی بھرپور صلاحیت رکھیندوں ۔ افغانستان دی سرزمین توں تھیوݨ آلی دہشت گردی تے اساں تحمل دا مظاہرہ کیتا، مگر کہیں ریاست کوں مسلسل حملے برداشت کائنی کرݨے چاہیدے۔ اقوامِ متحدہ دے منشور دے آرٹیکل 51 دے تحت ساکوں آپݨے دفاع دا حق حاصل اے، اساں آپݨی صلاحیتاں دا صرف ہک حصہ ظاہر کیتے، ساݙی سرزمین مقدس اے۔ اساں کہیں وی ملک یا گروہ کوں آپݨی سرزمین یا پڑوسی علاقیں کوں پاکستان دے خلاف استعمال کرݨ دی اجازت کائناں ݙیسوں۔صدرِ مملکت آکھیا جو اساں ایران تے جاری جنگ دی شدید مذمت کریندوں تے اوندی خود مختاری و علاقائی سالمیت دی حمایت دا اعادہ کریندوں ۔ ایں طرح خلیجی بھرا ملکاں تے حملیں دی وی مذمت کریندوں۔ خطے اچ استحکام تے بین الاقوامی قانون دا احترام ناگزیر اے، اساں انھاں سارے ملکاں دے شکر گزار ہیسے جنھاں جنوبی ایشیا اچ ݙو ایٹمی طاقتاں وچال کشیدگی گھٹ کرݨ اچ کردار ادا کیتا۔ پاکستان تے امریکہ دے تعلقات اچ نویں جہتاں پیدا تھئن جݙاں جو چین دے نال ساݙے تعلقات نویں بلندیاں تے پڄ چکئن۔ سی پیک 2.0 پاکستان دے انفراسٹرکچر اچ انقلاب گھن آسی۔صدرِ مملکت آکھیا جو اساں فلسطینی عوام دے حق اچ آپݨے اصولی موقف تے قائم ہیسے تے 1967ء توں پہلے دی سرحداں موجب دارالحکومت القدس الشریف تے مشتمل آزاد فلسطینی ریاست دے قیام دی حمایت جاری رکھیسوں۔ صدرِ مملکت آکھیا جو آبی تحفظ ہک اہم تزویراتی مسئلہ بݨ چکے۔ سندھ طاس معاہدے کوں معطل کرݨ تے پاݨی کوں بطور ہتھیار استعمال کرݨ کھلی خلاف ورزی اے۔ اساں آپݨے آبی حقوق دا ہر فورم تے دفاع کریسوں۔ وفاق دی مضبوطی مرکزیت توں نی بلکہ ہم آہنگی توں آندی اے، مشترکہ مفادات کونسل جیھے آئینی فورمز کوں فعال بݨاوݨا ہوسی۔ بلوچستان دی محرومیں دا ازالہ تے مقامی آبادی کوں ترقی اچ شریک کرݨ ساݙی ترجیح اے۔ انھاں آکھیا جو معاشی استحکام قومی سلامتی نال جڑیا ہویا اے۔ ساکوں ٹیکس نیٹ ودھاوݨ، توانائی اصلاحات، زرعی ترقی تے موسمیاتی انصاف کوں یقینی بݨاوݨا ہوسی ۔ بے نظیر انکم سپورٹ پروگرام کوں مزید موثر بݨاوݨا ہوسی تاں جومعاشرے دے تلویں طبقے کوں بااختیار بݨایا ونڄ سڳے، تریمتاں دی ترقی دے بغیر قومی ترقی ممکن کائنی۔ اساکوں آپݨی دھیریں کوں تحفظ، ڈیجیٹل رسائی تے معاشی خود مختاری ݙیوݨی ہوسی۔ انھاں آکھیا جو سلامتی، معیشت تے آئینی حکمرانی ہک ٻئے نال جڑئے ہوئے ستون ہن۔ اساکوں خود مختاری دے تحفظ، دہشت گردی دے خاتمے، معاشی ترقی، وفاقی ہم آہنگی تے جمہوری استحکام کوں آپݨی ترجیح بݨاوݨا ہوسی ۔ اللہ تعالیٰ اساکوں ایں امانت دی ادائیگی اچ کامیاب فرماوے۔