وزیرِ اعظم دی ہولی دے موقع تے ہندو برادری کوں مبارکباد، اے تہوار پاکستان دے ثقافتی تنوع دا مظہر تے معاشرتی ہم آہنگی دا عکاس اے، محمد شہباز شریف

اسلام آباد۔ 4 مارچ (اے پی پی) وزیرِ اعظم محمد شہباز شریف ہندواں دے مذہبی تہوار “ہولی” دے موقع تے ہندو برادری کوں مبارکباد ݙیندیں ہوئیں آکھیا جو اے تہوار پاکستان دے ثقافتی تنوع دا مظہر اتے معاشرتی ہم آہنگی دا عکاس اے، ہندو برادری اساݙے معاشرے دا بیش قدر حصہ اے جیندا سماجی ہم آہنگی، معاشی ترقی تے خوشحالی تے پُرامن بقائے باہمی اچ مثبت کردار اے۔ اے ڳالھیں انہاں ہولی دے موقع تے آپݨے سنیھے اچ آکھی۔ پی ایم آفس دے میڈیا ونگ توں جاری بیان موجب وزیرِ اعظم محمد شہباز شریف آکھیا جو ہندوواں دے مذہبی تہوار ہولی دے موقع تے او پاکستان دی ہندو کمیونٹی کیتے نیک تمناواں دا اظہار کریندن۔ انھاں آکھیا جو ہولی دا تہوار خوش نما رنگاں دے امتزاج نال معاشرتی ہم آہنگی دی عکاسی کریندے، ایندی روایات پاکستان دی ثقافتی تنوع دی مظہر ہن۔ انھاں دا آکھݨ ہئی جو ہندو کمیونٹی اساݙے معاشرے دا بیش قدر حصہ اے جیندا ملکی سماجی ہم آہنگی، معاشی ترقی تے خوشحالی تے پُرامن بقائے باہمی اچ مثبت کردار اے۔ وزیرِ اعظم محمد شہباز شریف آکھیا جو آئینِ پاکستان بلا تفریق رنگ و نسل، مذہب و عقیدہ سارے شہریاں کیتے مذہبی آزادی تے انسانی حقوق دا تحفظ کریندے۔ انھاں واضح کیتا جو حکومتِ پاکستان ساری اقلیتاں دے آئینی حقوق دی محافظ اے، ایں تناظر اچ حکومتی اقدامات اچ پالیسی برائے بین المذاہب ہم آہنگی (2025) تے حکمتِ عملی برائے مذہبی برداشت (2025) نمایاں ہن۔ وزیرِ اعظم محمد شہباز شریف بین المذاہب مکالمے، عبادت گاہواں دی حفاظت تے آپسی احترام دی سماجی روش دے فروغ کیتے من حیث القوم کم دی لوڑھ تے زور ݙیندے ہوئیں دعوت ݙتی جو آؤ اج ایں قومی عزم دی تجدید کروں جو اساں رواداری، ہمدردی تے یکجہتی دی اقدار دے نال پُر امن، مشترک تے خوشحال مستقبل یتے رل کراہیں کوششاں جاری رکھیسوں۔