وفاقی وزیرِ پٹرولیم نال سعودی سفیر دی ملاقات، پاکستان کوں ینبع بندرگاہ توں تیل سپلائی دی سکیورٹی دی یقین دہانی

اسلام آباد۔ 4 مارچ (اے پی پی) وفاقی وزیرِ پٹرولیم علی پرویز ملک نال پاکستان اچ سعودی عرب دے سفیر نواف سعید المالکی ملاقات کیتی جئیں اچ آپسی دلچسپی دے امور تے ݙو پاسہ تعاون تے ڳالھ مہاڑ کیتی ڳئی۔ ترجمان پٹرولیم ڈویژن دے مطابق وفاقی وزیر سعودی سفیر کوں اڄوکیصورتحال تے آبنائے ہرمز دی بندش دے عالمی توانائی منڈیاں تے اثرات بارے ݙسیا۔ انھاں آکھیا جو پاکستان روزانہ دی بنیاد تے بدلدی ہوئی صورتحال دا بغور جائزہ گھندا پئے کیونجو پاکستان دے ایندھن دے وݙے حصے دی ترسیل آبنائے ہرمز دے ذریعے تھیندی اے۔ انھاں آکھیا جو حکومتِ پاکستان آپݨی عوام کیتے توانائی دی فراہمی دے سلسلے دے تسلسل کوں یقینی بݨاوݨ کیتے فعال اقدامات کریندی پئی اے۔ انھاں آکھیا جو مشکل حالات اچ سعودی عرب سویں برادر ملک دی حمایت پاکستان کیتے ٻہوں اہمیت رکھیندی اے۔ انھاں آکھیا جو سعودی ذرائع بحیرہ احمر اچ واقع سعودی بندرگاہ ینبع دے ذریعے سپلائی دی سکیورٹی دی یقین دہانی کرائی اے جیہڑی توانائی دی لوڑھ پوری کرݨ اچ مددگار ثابت تھی سڳدی اے۔ علی پرویز ملک سعودی عرب دی مسلسل حمایت تے اظہارِ تشکر کیتا اتے آکھیا جو سعودی عرب پہلے ای پاکستان دی معاونت کریندا پئے۔ انھاں آکھیا جو پاکستان کیتے خام تیل چاوݨ کیتے ہک جہاز کوں پاکستان توں ینبع روانہ کرݨ دی یقین دہانی کرائی ڳئی اے۔ انھاں ایں امید دا اظہار وی کیتا جو ینبع بندرگاہ توں تیل دی سپلائی کوں پاکستان کیتے ترجیح ݙتی ویسے۔ سعودی سفیر نواف سعید المالکی آکھیا جو او بدلدی ہوئی صورتحال توں پوری طرح آگاہ ہن اتے ایں عزم دا اعادہ کیتا جو سعودی عرب کہیں وی ہنگامی ضرورت کوں پورا کرݨ کیتے پاکستان دے نال مضبوطی نال کھڑا رہسی۔ انھاں زور ݙیندے ہوئیں آکھیا جو پاکستان اتے سعودی عرب برادر ممالک ہن اتے آزمائش اچ ہک ٻئے دے نال کھڑے رہسن۔