پٹرولیم مصنوعات دی بلا تعطل دستیابی یقینی بݨاوݨ حکومت دی اولین ترجیح اے، سارے پالیسی فیصلیں اچ ایں کوں مدنظر رکھیا ویسی، وفاقی وزیرِ خزانہ محمد اورنگزیب دا پٹرول دی قیمتاں دی نگرانی کیتے وزیرِاعظم دی بݨائی ڳئی کمیٹی دے اجلاس توں خطاب

اسلام آباد۔ 4 مارچ (اے پی پی) وفاقی وزیرِ خزانہ و محصولات سینیٹر محمد اورنگزیب آکھیا جو پٹرولیم مصنوعات دی بلا تعطل دستیابی یقینی بݨاوݨ حکومت دی اولین ترجیح اے، سارے پالیسی فیصلیں اچ ایں کوں سامݨے رکھیا ویسی ، قومی توانائی سلامتی دے تحفظ تے مقامی منڈیاں اچ استحکام برقرار رکھݨ کیتے بروقت تے مربوط اقدامات کیتے تیار ہیسے۔ انھاں اے ڳالھ اتھاں خطے اچ ابھردی ہوئی صورتحال دے تناظر اچ پٹرول دی قیمتاں دی نگرانی کیتے وزیرِاعظم دی طرفوں بݨائی ڳئی کمیٹی دے اجلاس دی صدارت کریندے آکھی۔اجلاس اچ توانائی دی علاقائی تے عالمی بدلدی صورتحال تے غور دا سلسلہ جاری رکھیندے ملک اچ پٹرولیم مصنوعات دے ذخیرے تے سپلائی چین دا تفصیلی جائزہ ڳھدا ڳیا۔ شرکاء کوں خام تیل تے ریفائن شدہ پٹرولیم مصنوعات بشمول پٹرول، ڈیزل، ہوابازی دے ایندھن تے ایل پی جی دے ملکی ذخیرے، انھاں دی دستیابی دے ݙینھاں تے یومیہ کھپت دے رجحاناں توں آگاہ کیتا ڳیا۔ اجلاس دے شرکاء کوں عالمی تیل مارکیٹ دی پیش رفت توں وی آگاہ کیتا ڳیا جیندے اچ بین الاقوامی بنچ مارک قیمتاں اچ ردوبدل، فریٹ تے انشورنس اخراجات، بحری رستیں دی صورتحال تے اہم سمندری گزرگاہواں دے بدلدے حالات شامل ہن۔کمیٹی نوٹ کیتا جو بالخصوص آبنائے ہرمز توں متعلق غیر یقینی صورتحال تے اوندے توانائی دی عالمی تجارت تے ممکنہ اثرات دے پیشِ نظر بین الاقوامی توانائی دا ماحول بدستور غیر یقینی اے۔ شرکاء ایل این جی تے ایل پی جی دی منڈیاں اچ تھیوݨ آلی پیش رفت دا وی جائزہ ڳھدا۔ کمیٹی کوں ݙسایا ڳیا جو طویل المدتی معاہدیں دے تحت ایل این جی دی درآمدات پاکستان دے توانائی مکس دا اہم جزو ہن تاہم علاقائی بحری رستیں اچ رکاوٹاں عالمی ایل این جی لاجسٹکس کوں متاثر کر سڳدن۔ سرحد پار ذرائع توں ایل پی جی دی آمد تے وی کڑی نظر رکھی ویندی پئی اے تا جو ملک اچ بلا تعطل دستیابی یقینی بݨائی ونج سڳے۔کمیٹی رسدی سلامتی کوں مضبوط بݨاوݨ کیتے مختلف ہنگامی اقدامات تے غور کیتا جنھاں اچ بین الاقوامی شراکت داراں نال رابطہ تے متبادل سپلائی ذرائع دی تلاش شامل اے۔ ایں ضمن اچ اراکین کوں ݙسایا ڳیا جو لوڑھ پووݨ تے اضافی خام تیل تے پٹرولیم مصنوعات دے حصول کیتے خطے دے دوست ملکاں تے سپلائرز دے نال سفارتی تے تجارتی سطح تے رابطے جاری ہن۔ کمیٹی اے وی نوٹ کیتا جو توانائی دے حصول دے ذرائع کوں متنوع بݨاوݨ کیتے علاقائی انرجی حبز دے ذریعے مختلف آپشنز دا جائزہ ڳھدا ویندا پئے جنھاں اچ بحیرہ احمر تے خلیجی خطے دی بندرگاہواں دے ذریعے ممکنہ انتظامات شامل ہن تاں جو ریفائنری آپریشنز دا تسلسل برقرار رہے تے سپلائی دا استحکام یقینی بݨایا ونڄ سڳے۔وزیرِ خزانہ ایں ڳالھ تے زور ݙتا جو پٹرولیم مصنوعات دی بلا تعطل دستیابی یقینی بݨاوݨ حکومت دی اولین ترجیح اے تے سارے پالیسی فیصلیں اچ ایں کوں مدنظر رکھیا ویسی۔ انھاں اعادہ کیتا جو کمیٹی روزانہ دی بنیاد تے پیش رفت دی نگرانی کریندی پئی اے تے قومی توانائی سلامتی دے تحفظ تے مقامی منڈیاں اچ استحکام برقرار رکھݨ کیتے وقتی تے مربوط اقدامات کیتے تیار اے۔ کمیٹی ایں امر تے وی زور ݙتا جو بالخصوص بین الاقوامی اتار چڑھاؤ دے دوران پٹرولیم مصنوعات دی ذخیرہ اندوزی، رخ موڑݨ یا سمگلنگ روکݨ یقینی بݨائی ونڄے۔ متعلقہ اداریں کوں ہدایت کیتی ڳئی اے جو او کڑی نگرانی برقرار رکھن تے صوبائی حکومتاں دے نال رابطہ و ہم آہنگی کوں مزید مضبوط کرن تاں جو ملکی سپلائی محفوظ رہے۔اجلاس اچ فیصلہ کیتا ڳیا جو سارے صوبیں دے چیف سیکرٹریز کل تھیوݨ آلے کمیٹی دے اجلاس اچ شرکت کریسن تاں جو حتمی سمری تے مجوزہ قومی ایکشن پلان تے غور کیتا ونڄ سڳے۔ کمیٹی آپݨی مشاورت جاری رکھیسی تاں جو سارے اسٹیک ہولڈرز دے تعاون نال قومی سطح تے نافذ کیتے ونڄݨ کیتے ہک جامع حکمتِ عملی کوں حتمی شکل ݙتی ونج سڳے۔ اجلاس اچ وفاقی وزیرِ پٹرولیم علی پرویز ملک، وفاقی وزیرِ قومی غذائی تحفظ و تحقیق رانا تنویر حسین، وفاقی وزیرِ توانائی سردار اویس احمد خان لغاری، وزیرِ مملکت خزانہ بلال اظہر کیانی، وفاقی سیکرٹریز تے متعلقہ وزارتاں، ڈویژنز تے ریگولیٹری اداریں دے سینئر حکام شرکت کیتی۔