پاکستان-ازبکستان سانجھے ورکنگ گروپ دا اجلاس، تجارت دے ودھارے اتے پنڄ سالہ روڈ میپ تے غور

اسلام آباد۔ 6 مارچ (اے پی پی) وزیراعظم دے معاونِ خصوصی برائے صنعت و پیداوار ہارون اختر خان دی صدارت پاکستان تے ازبکستان وچال ݙوپاسہ تجارت دے فروغ کیتے قائم سانجھے ورکنگ گروپ دا ݙوجھا اعلیٰ سطحی اجلاس تھیا۔ اجلاس اچ سیکرٹری تجارت جواد پال سودھے مختلف وفاقی وزارتاں تے ایس آئی ایف سی دے نمائندیاں شرکت کیتی۔ اجلاس دے دوران ݙوہیں ملکاں وچال تجارت دے فروغ، تجارتی رستیاں، مختلف شعبیاں اچ تعاون تے پہلے توں طے شدہ مفاہمتی یادداشتاں تے پیش رفت دا تفصیلی جائزہ ڳھدا ڳیا۔ اجلاس توں خطاب کریندیں ہوئیں ہارون اختر خان آکھیا جو وزیراعظم شہباز شریف دے وژن دے تحت پاکستان تے ازبکستان وچال تجارت اچ ودھارے کیتے 2026 توں 2030 تئیں دا پنج سالہ روڈ میپ پیش کیتا ویسی۔ انھاں آکھیا جو ازبکستان دے نال طے شدہ پروٹوکولز تے عملدرآمد وی ایں روڈ میپ دے ذریعے یقینی بݨایا ویسی۔ انھاں آکھیا جو پاکستان تے ازبکستان اقتصادی شراکت داری اچ نویں رستے کھولݨ ویندے پئن۔ مختلف شعبیاں کیتے مخصوص حکمتِ عملی تیار کرݨ دی غرض نال اٹھ ورکنگ گروپس قائم کیتے ڳئن، جنھاں آپݨے آپݨے شعبیاں کیتے مجوزہ روڈ میپس اجلاس اچ پیش کیتے۔ ہارون اختر خان ݙسایا جو ازبکستان کیتے چین دے ذریعے متبادل تجارتی رستہ مختصر تے آسان ثابت تھی سڳدے اتے ایں بارے منصوبہ تیار کیتا ویندا پئے۔ اجلاس اچ ݙوہیں ممالک وچال توانائی، ٹرانسپورٹ، زراعت تے صنعت دے شعبیاں اچ تعاون ودھاوݨ تے اتفاق کیتا ڳیا۔