وزیرِ اعظم دی صدارت اڄوکے عالمی تناظر اچ ملکی معاشی صورتحال دا جائزہ گھنݨ کیتے اجلاس، معاشی ترقی، سادگی تے بچت کیتے لائحہ عمل تشکیل ݙیوݨ تے 48 گھنٹیاں اچ قابلِ عمل تجاویز پیش کرݨ دی ہدایت

لاہور۔ 7 مارچ (اے پی پی) وزیرِ اعظم محمد شہباز شریف مشرقِ وسطیٰ تے خلیج اچ کشیدگی دے نتیجے اچ عالمی معاشی دباؤ کوں ݙیکھدیں ہوئیں سادگی تے بچت کیتے لائحہ عمل ٻݨاوݨ تے حکومتی کمیٹی کوں 48 گھنٹیاں دے اندر ایں حوالے نال قابلِ عمل تجاویز پیش کرݨ دی ہدایت کیتی اے۔ ہفتہ کوں وزیرِ اعظم محمد شہباز شریف دی صدارت اڄوکے عالمی تناظر اچ ملکی معاشی صورتحال دا جائزہ گھنݨ کیتے اجلاس تھیا جیندے اچ عالمی سطح تے اڄوکی کشیدگی دے خطے تے پووݨ آلے معاشی اثرات تے بریفنگ ݙتی ڳئی۔ وزیرِ اعظم صورتحال دے پیشِ نظر معاشی ترقی، سادگی تے بچت کیتے لائحہ عمل تشکیل ݙیوݨ تے ایں بارے کمیٹی کوں آندے 48 گھنٹیاں اچ قابلِ عمل تجاویز پیش کرݨ دی ہدایت ݙیندیں ہوئیں آکھیا جو ایجھا لائحہ عمل وضع کیتا ونجے جیندے اچ عوام تے بوجھ ڳھٹ توں ڳھٹ ہووے، عوامی ریلیف کوں اولین ترجیح ݙتی ونجے۔ اجلاس اچ ݙتی ڳئی بریفنگ اچ ݙسایا ڳیا جو وزیرِ اعظم دی ہدایت تے گزریل ہفتے ای اڄوکی کشیدگی دے عالمی تے ملکی سطح تے معاشی اثرات دا جائزہ گھنݨ کیتے کمیٹی تشکیل ݙے ݙتی ڳئی ہئی جیہڑی ایں حوالے نال لائحہ عمل تے کم کریندی پئی ہئی، جئیں پاروں ملک اچ پیٹرولیم مصنوعات دی ڳھٹکی پیدا کائنی تھئی۔ بریفنگ دے مطابق گزریل ݙینہہ پیٹرولیم مصنوعات دی قیمت اچ ودھارا کمیٹی دی تجویز تے تھیا، جیندے اچ عالمی سطح تے اضافے دا ڳھٹ توں ڳھٹ بوجھ صارفین تے منتقل کیتا ڳیا۔ وزیرِ اعظم کمیٹی کوں مزید فعال و متحرک تھی تے کم کرݨ تے جلد از جلد عوام کیتے سہل تے قابلِ عمل سفارشات پیش کرݨ دی ہدایت کیتی۔ انھاں حکم ݙتا جو جیہڑا وی پٹرول پمپ یا کمپنی مصنوعی قلت پیدا کرݨ یا ذخیرہ اندوزی اچ ملوث ہووے، اونکوں فوراً بند کیتا ونجے اتے اوندا لائسنس منسوخ کر تے قانونی کارروائی کیتی ونجے۔ وزیراعظم  وزیرِ خزانہ تے وزیرِ پیٹرولیم کوں ہدایت کیتی جو چاریں صوبیاں دا دورہ کرن تے صوبائی حکومتاں دے نال رل تے پیٹرولیم مصنوعات دی بچت تے انھاں دی عوام کوں بلاتعطل فراہمی دے حوالے نال لائحہ عمل تے منصوبہ بݨاون۔