پاکستان تریمتیں تے ٻالڑیاں دے حقوق تے بااختیار بݨاوݨ کیتے آپݨے عزم تے قائم اے، اسحاق ڈار

اسلام آباد۔ 8 مارچ (اے پی پی) نائب وزیرِ اعظم تے وزیرِ خارجہ سینیٹر محمد اسحاق ڈار آکھیا جو اساں انھاں تریمتیں دے حوصلے، ثابت قدمی تے قیادت کوں خراجِ تحسین پیش کریندوں جنھاں دے عزم تے جدوجہد معاشریاں اچ مثبت تبدیلی پیدا کیتی اے، کمیونٹیز کوں مضبوط بݨائے اتے آوݨ آلی نسلاں کیتے امید تے حوصلے دا سنیھا ݙتے۔ اتوار کوں وزارتِ خارجہ توں جاری بیان دے مطابق عالمی یومِ تریمت دے موقع تے آپݨے سنیھے اچ نائب وزیراعظم تے وزیر خارجہ سینیٹر محمد اسحاق ڈار آکھیا جو تریمتیں دی آوازاں، صلاحیتاں تے امنگاں جامع ترقی، مؤثر طرزِ حکمرانی تے پائیدار امن کیتے نہایت اہم محرک ہن۔ پاکستان تریمتیں تے ٻالڑیاں دے حقوق تے بااختیار بݨاوݨ کیتے آپݨے عزم تے قائم اے۔ انھاں آکھیا جو اساݙا آئین مساوات تے ہر قسم دے امتیاز دے خلاف تحفظ دی ضمانت ݙیندے تریمتیں دے خلاف ہر قسم دے امتیاز دے خاتمے دے کنونشن (CEDAW) دے رکن ملک دی حیثیت نال پاکستان ایجھی قانون سازی، پالیسی تے ادارہ جاتی اصلاحات کوں اڳوں ودھیندا پئے جیہڑی تریمتیں دی شرکت تے قیادت کوں ٻیا مضبوط بݨاوے۔ پاکستان کوں ایں ڳالھ تے وی فخر اے جو او ایں سال اسلامی تعاون تنظیم (OIC) دی تریمتیں بارے 9ویں وزارتی کانفرنس دی میزبانی کریندا پئے، جیہڑی اسلامی دنیا تے ایندے توں اڳوں تریمتیں دے حقوق دے فروغ کیتے اساݙے عزم دا مظہر اے۔