محکمہ موسمیات دی ملک دے اُتلے علاقیں اچ 9 توں 12 مارچ تئیں مینھ وسݨ دی پیشگوئی

اسلام آباد۔ 9 مارچ (اے پی پی) محکمہ موسمیات ملک دے اُتلے علاقیں اچ 9 توں 12 مارچ تئیں ، اندھاری تے کھمݨ گاجاں نال مینھ وسݨ دی پیشگوئی ظاہر کیتی اے ۔محکمہ موسمیات پیشگوئی کیتی جو ہک مغربی لہر سنوار دی شام ملک دے مغربی حصیں تئیں پڄݨ دا امکان اے تے 12 مارچ تئیں برقرار رہݨ دا امکان اے۔ایں موسمی نظام دے زیرِ اثر چترال، دیر، سوات، کوہستان، شانگلہ، بٹگرام، بونیر، مالاکنڈ، مانسہرہ، ایبٹ آباد، ہری پور، گلگت بلتستان تے کشمیر دے ضلعیں اچ 9 توں 12 مارچ تئیں جزوی طور تے جھڑ آلا تے موسم دی حالت نال ہلکا مینھ، اندھاری تے کھمݨ گاجاں دا امکان اے ، جݙاں جو 10 تے 11 مارچ کوں خیبر، مہمند، پشاور، صوابی، مردان، چارسدہ، نوشہرہ باجوڑ، بنوں، وزیرستان، اورکزئی، کرم، کوہاٹ، ہنگو تے میانوالی اچ وی ہلکا مینھ وسݨ دا امکان اے۔ اسلام آباد، پوٹھوہار ریجن، مری، گلیات تے اچ 9 مارچ (رات) توں 11 مارچ تئیں وقفے وقفے نال مینھ اندھاری تے کھمݨ گاجاں نال مینھ وسݨ دا امکان اے ۔ پیشگوئی دے دوران اسلام آباد تے ملک دے اُتلے علاقیں اچ کجھ جہیں تے گڑھا پووݨ دا وی امکان اے۔ممکنہ اثرات دے پیشِ نظر ملک دے اتلے علاقیں اچ ݙینھ ویلھے درجہ حرارت اچ 3 توں 4 ڈگری سینٹی گریڈ تئیں گھٹ تھیوݨ دا امکان اے ایں دوران اُتلے خیبر پختونخوا، گلگت بلتستان تے کشمیر دے حساس علاقیں اچ لینڈ سلائیڈنگ دا خطرہ تھی سڳدے۔ سیاحواں کوں مشورہ ݙتا ویندے جو او زیادہ محتاط رہن تے پیشگوئی دے عرصے دے دوران غیر ضروری سفر توں پرہیز کرن۔ کساناں کوں مشورہ ݙتا ویندے جو او آپݨی فصلاں دا انتظام موجودہ موسمی حالات موجب کرن۔ ایران دی اڄوکی صورتحال پاروں ہواواں آلودگی کھنڈا سڳدن تے ملک دے مغربی حصیں اچ ہوا دا معیار خراب کرسڳدن۔