حکومت قومی توانائی سلامتی دے تحفظ تے سپلائی چین کوں بلا تعطل جاری رکھݨ کیتے مکمل طور تے پُرعزم اے، وزیرِ خزانہ محمد اورنگزیب دا کمیٹی اجلاس توں خطاب

اسلام آباد۔ 9 مارچ (اے پی پی)وفاقی وزیرِ خزانہ و محصولات سینیٹر محمد اورنگزیب آکھیے جو پیشگی منصوبہ بندی تے مختلف وزارتاں وچال نیڑے رابطہ کاری دے نتیجے اچ پاکستان اچ توانائی دی رسد دی صورتحال مستحکم اے، حکومت مارکیٹ دے استحکام کوں برقرار رکھݨ، قومی توانائی سلامتی دے تحفظ تے بدلدی ہوئی عالمی صورتحال اچ سپلائی چین کوں بلا تعطل جاری رکھݨ کیتے مکمل طور تے پُرعزم اے۔انھاں نے اے ڳالھ اتھاں خطے اچ ابھردی ہوئی صورتحال دے تناظر اچ پٹرول دی قیمتاں دی نگرانی کیتے وزیرِاعظم دی طرفوں بݨائی ڳئی کمیٹی دے اجلاس دی صدارت کریندے آکھی۔ اجلاس اچ علاقائی تے عالمی توانائی دی بدلدی ہوئی صورتحال تے تفصیلی غور کیتا ڳیا تے ملک اچ پٹرولیم مصنوعات دے ذخیرے دی پوزیشن دا جائزہ ڳھدا ڳیا۔ اجلاس اچ ݙسایا ڳیا جو پٹرولیم مصنوعات دے ذخائر تسلی بخش سطح تے ہن تے سپلائی چین مؤثر انداز اچ کم کریندی پئی اے، جݙاں جو آوݨ آلے ہفتے کیتے درآمدی انتظامات کوں حتمی شکل ݙتی ونڄ چکی اے۔کمیٹی دے ارکان کوں عالمی سطح تے خام تیل تے ریفائن شدہ پٹرولیم مصنوعات دی قیمتاں اچ اڄوکے رجحانات دا وی ݙسایا ڳیا جیندے اچ جغرافیائی و سیاسی صورتحال پاروں لہہ چڑھ شامل ہئی۔ اجلاس اچ خام تیل دی درآمد، ریفائنری آپریشنز تے بحری نقل و حمل متعلق انتظامات دا وی جائزہ ڳھدا ڳیا۔ وفاقی وزیر ایں عزم دا اعادہ کیتا جو حکومت مارکیٹ اچ استحکام برقرار رکھݨ کیتے ہر ممکن قدم چیسی تے ایں بدلدی صورتحال اچ عوامی سہولت کوں ترجیح ݙتی ویسی تاں جو سپلائی چین اچ کوئی رکاوٹ پیدا نہ تھیوے، ایں مقصد کیتے روز دی بنیاد تے نگرانی دا عمل جاری رہسی تاں جو مستقبل دی منصوبہ بندی بہتر انداز اچ ممکن تھیسی۔اجلاس اچ وفاقی وزیرِ پیٹرولیم علی پرویز ملک، وفاقی وزیررانا تنویر حسین، جام کمال خان، محمد جنید انوار چوہدری تے وزیرِ مملکت بلال اظہر کیانی دے علاوہ سینئر حکام شرکت کیتی۔