خارجہ پالیسی بارے اچ سوشل میڈیا تے غیر ضروری تبصریاں توں پرہیز کیتا ونڄے، اساݙے کیتے ملک دا مفاد مقدم اے، وفاقی وزیرِ اطلاعات عطاء اللہ تارڑ دی پریس کانفرنس

اسلام آباد۔ 10 مارچ (اے پی پی) وفاقی وزیرِ اطلاعات تے نشریات عطاء اللہ تارڑ خارجہ پالیسی بارے اچ سوشل میڈیا تے غیر ضروری تبصریاں کوں نقصان دہ قرار ݙیندے ہوئیں آکھیا جو اساݙے کیتے پاکستان دا مفاد مقدم اے، خطے دے ممالک دے نال اساݙے قریبی تے دوستانہ تعلقات ہن، خارجہ پالیسی کوں مقامی معاملات دے طور تے نہ ڳھدا ونڄے۔ منگل کوں اتھاں پی ٹی وی ہیڈ کوارٹرز اچ وفاقی وزیرِ قانون اعظم نذیر تارڑ اتے وزیرِ مملکت برائے داخلہ طلال چوہدری دے نال پریس کانفرنس توں خطاب کریندیں ہوئیں وفاقی وزیرِ اطلاعات تے نشریات عطاء اللہ تارڑ آکھیا جو موجودہ صورتحال اچ دفترِ خارجہ دا کردار نہایت کلیدی ریہے۔ نہ صرف نائب وزیراعظم دے دفتر توں بلکہ ترجمان دفترِ خارجہ توں وی ہر ݙوجھے ݙینہہ پریس ریلیز جاری کیتی ویندی اے اتے ترجمان میڈیا دے سوالاں دے جواب ݙیوݨ کیتے وی دستیاب ہوندن۔ ایں طرح وزیراعظم آفس ولوں وی خارجہ تعلقات بارے تفصیلی پریس ریلیز جاری کیتی ویندی اے۔ انھاں آکھیا جو موجودہ دور اچ ویوز حاصل کرݨ دی دوڑ لڳی ہوئی اے، جے کہیں وی لاگ تے زیادہ ویوز حاصل کرݨ مقصود ہووے تاں بعض اوقات ݙو ملکاں دے حوالے نال ایجھی ڳالھیں کیتی ویندن جنھاں نال زیادہ توجہ حاصل تھیوے اتے اوندے نتیجے اچ مونیٹائزیشن اچ اضافہ تھیوے۔ انھاں آکھیا جو عرب ممالک اتے ایران پاکستان کیتے اہمیت رکھیندن، ایران اساݙا ہمسایہ ملک اے جݙاں جو پاکستان دی پالیسی ہمیشہ توں واضح رہی اے جو قومی مفاد سب توں مقدم اے۔ انھاں ٻیا آکھیا جو پاکستان دی آپݨی خارجہ پالیسی اے اتے ایں دے تحت توازن برقرار رکھیندیں ہوئیں مسلم ملکاں دے نال اساݙے بہترین تعلقات قائم ہن۔ وفاقی وزیر آکھیا جو جݙاں اساں ݙوجھیاں کوں ڈس کریڈٹ کرݨ دی کوشش کریندوں اتے آپݨے خیالات قوم تئیں پڄاوݨ کیتے خارجہ پالیسی دی من مانی تشریحات پیش کریندوں تاں اے مناسب طرزِ عمل کائنی۔ انھاں آکھیا جو خارجہ پالیسی دے حوالے نال سوشل میڈیا تے غیر ضروری تبصرے نقصان دہ ثابت تھی سڳدن، انھاں نال کڄھ ملکاں کوں ایجھا محسوس تھیندے جو شاید اے ریاست دی پالیسی ہووے کیونجو انھاں کول خارجہ پالیسی دے معاملات تے میڈیا اچ آوݨ آلی ڳالھیں کوں عموماً ریاستی موقف سمجھیا ویندے۔ انھاں آکھیا جو مقامی سیاست اچ سو واری تنقید کیتی ونڄے لیکن جے ایہو طرزِ عمل خارجہ پالیسی دے معاملات تے اختیار کیتا ویسی تاں ایندے نال ملک کوں نقصان تھی سڳدے، لہٰذا خارجہ پالیسی تے بے لاگ تبصریاں توں پرہیز کیتا ونڄے، ایں نال صورتحال بہتر تھیسی۔