پاکستان اچ آئینی تے قانون سازی دے ذریعے تریمتاں دی ترقی کیتے نمایاں کردار ادا کیتا ڳئے، قومی اسمبلی اچ متفقہ قرارداد منظور

اسلام آباد۔ 10 مارچ (اے پی پی) قومی اسمبلی تریمتاں دے عالمی ݙینھ دی مناسبت نال متفقہ قرارداد منظور کریندے آکھیے جو آئینی تے قانون سازی دے اقدامات دے ذریعے پاکستان تریمتاں دی ترقی کیتے نمایاں کردار ادا کیتے۔ قومی اسمبلی اچ پیپلز پارٹی دی رکن شاہدہ رحمانی اے قرارداد ایوان اچ پیش کیتی۔ ایں توں پہلے ایوان اچ رولز معطل کرݨ دی قرارداد وفاقی وزیر پارلیمانی امور ڈاکٹر طارق فضل چوہدری پیش کیتی جیندے منظور تھیوݨ دے بعد اے قرارداد پیش کیتی ڳئی جیندے اچ آکھیا ڳیا جو اے ایوان پاکستان دی ترقی تے خوشحالی اچ تریمتاں دے نمایاں کردار، انھاں دی سماجی، سیاسی تے اقتصادی ترقی اچ خدمات دی تعریف کریندے ایں عزم دا اعادہ کریندے جو تریمتاں کوں بااختیار بݨاوݨ کیتے کوئی کسر باقی نہ چھوڑی ویسی۔قرارداد اچ آکھیا ڳیا جو تریمتاں کوں بنیادی انسانی حقوق، انصاف تئیں برابر رسائی تے فیصلہ سازی اچ شامل کرݨ دی لوڑھ اے۔ پاکستان ایں موقع تے ایں عزم دا اعادہ کریندے جو تریمتاں کوں آئین اچ جیڑھے حقوق ݙتے ڳئن انھاں تے مکمل عملدرآمد یقینی بݨایا ویسی تے صنفی امتیاز و تشدد دے خلاف انھاں کوں تحفظ ݙتا ویسی۔ قرارداد اچ آکھیا ڳیا جو گورننس اچ تریمتاں دی شرکت کوں یقینی بݨایا ویسی، انھاں دے تحفظات دور کرݨ تے انھاں کوں قانونی تحفظ ݙیوݨ کیتے اقدامات چاتے ویسن۔ تریمتاں دی ترقی کیتے کیتی ونڄݨ آلی سرمایہ کاری اچ ودھارے دی لورھ اے تاں جو تریمتاں تے ٻالڑیاں کوں براہِ راست ایندا فائدہ مل سڳے۔ ترقیاتی فنڈز تے سرکاری وسائل دے استعمال اچ تریمتاں کوں مقدم رکھیا ویسی۔ اے ایوان ویمن پارلیمانی کاکس دی تریمتاں کیتے اجتماعی کوششاں دی تعریف کریندے انھاں دی آواز کوں مزید مستحکم بݨاوݨ دے اقدامات دا عزم کریندے۔ ڈپٹی سپیکر قرارداد ایوان اچ پیش کیتی جیندے ایوان متفقہ طور تے منظوری ݙے ݙتی۔