حکومت دا کفایت شعاری کیتے ہفتہ وار ودھیک چھٹی جمعہ دے ݙینھ کرݨ دا فیصلہ، معیشت کوں مستحکم رکھیا ویسی، وزیراعظم شہباز شریف

اسلام آباد۔ 10 مارچ (اے پی پی) حکومت کفایت شعاری تے توانائی دی بچت کیتے ہفتہ وار ودھیک چھٹی جمعہ دے ݙینھ کرݨ دا فیصلہ کیتے، ساری وفاقی وزارتاں تے ڈویژنز کفایت شعاری کیتے چاتے ڳئے اقدامات دی روزانہ تے ہفتہ وار رپورٹ جمع کریسن۔ وزیراعظم محمد شہباز شریف آکھیے جو حکومت ہر ممکن کوشش کریندی پئی اے جو عالمی حالات دے باوجود معیشت کوں مستحکم رکھیا ونڄے، کفایت شعاری دے اقدامات دا تھرڈ پارٹی آڈٹ کروایا ونڄے۔ ساری وزارتاں تے ادارے کفایت شعاری دے تحت بند کیتی ڳئی گاݙیاں دی تصویراں کابینہ ڈویژن کوں بھیڄن۔ وزیراعظم ہاؤس اچ اجلاس تھیا جیندے اچ نائب وزیراعظم اسحاق ڈار،وزیراطلاعات عطا اللہ تارڑ، مصدق ملک، محمد اورنگزیب تے ٻئے حکام شریک تھئن۔ اجلاس اچ فیصلہ کیتا ڳیا جو ہفتہ وار ودھیک چھٹی جمعہ دے ݙینھ تھیسی۔ وزیراعظم آکھیا جو اسحاق ڈار دی قیادت اچ ہک خصوصی کمیٹی روزانہ دی بنیاد تے اقدامات دا جائزہ گھن تے رپورٹ پیش کریسی۔ انھاں ہدایت کیتی جو ورک فرام ہوم کوں موثر بݨاوݨ دے حوالے نال ہر وزارت آپݨی رپورٹ وزیراعظم دفتر بھیڄے تاں جو ایں مہم نال فیدہ پڄ سڳے۔