سینیٹ دی قائمہ کمیٹی اطلاعات و نشریات موشن پکچر ترمیمی ٻل منظور کر ڳھدا، پیکا مقدمیں دے معاملے تے ذیلی کمیٹی قائم

اسلام آباد۔ 10 مارچ (اے پی پی) سینیٹ دی قائمہ کمیٹی اطلاعات و نشریات موشن پکچر (ترمیمی) ٻل 2024ء منظور کر ڳھدا۔ کمیٹی دا اجلاس پارلیمنٹ لاجز اسلام آباد دے اولڈ پپس ہال اچ منعقد تھیا۔ اجلاس اچ موجود ارکان متفقہ طور تے سینیٹر سرمد علی کوں اجلاس دی کارروائی دی صدارت کیتے نامزد کیتا۔ کمیٹی مختصر بحث دے بعد متفقہ طور تے موشن پکچر (ترمیمی) ٻل 2024ء منظور کر ڳھدا جیڑھا ایں توں پہلے دے وزیرِ اطلاعات و نشریات مرتضیٰ سولنگی دی طرفوں پیش کیتا ڳیا ہئی۔وفاقی سیکرٹری اطلاعات و نشریات کمیٹی کوں ݙسایا جو کمیٹی دی طرفوں پیش کیتی ڳئی پنجے سفارشات ٻل اچ شامل کر ڳھدیاں ڳئن جنھاں اچ سیکشن (2)6، سیکشن 7، سیکشن 9 (اپیلٹ کمیٹی دی تشکیل)، سیکشن 13 تے سیکشن 15 اچ ترامیم شامل ہن۔ کمیٹی سینیٹر محمد عبدالقادر دی طرفوں پیش کیتی ڳئی پرائیویٹ ممبر بل ”پاکستان براڈ کاسٹنگ کارپوریشن (ترمیمی) ٻل 2025ء“ تے وی غور کیتا تاں جو ایں معاملے کوں وزارتِ خزانہ تے وزارتِ قانون و انصاف دے نال مزید مشاورت تئیں ملتوی کر ݙتا ڳیا۔ ٻل دا بنیادی مقصد بورڈ آف ڈائریکٹرز اچ ہک رکنِ پارلیمنٹ کوں شامل کرݨا اے۔اجلاس دے دوران سینیٹر سید وقار مہدی ایں توں پہلے چاٹے ڳئے معاملے دی نشاندہی کیتی جو الیکٹرانک جرائم دے تدارک دے قانون (پیکا) دے تحت مقدمات نامزد اتھارٹی دی بجائے صوبائی پولیس حکام دی طرفوں درج کیتے ویندے پئن۔ ایں سلسلے اچ کمیٹی فیصلہ کیتا جو معاملے تے غور کیتے چارے صوبیں دے انسپکٹرز جنرل پولیس تے ایڈووکیٹ جنرلز کوں سݙیا ونڄے۔ تفصیلی بحث دے بعد کمیٹی ایں معاملے دا تفصیلی جائزہ گھنݨ کیتے ہک ذیلی کمیٹی بݨاوݨ دا وی فیصلہ کیتا۔ اجلاس اچ وفاقی وزیرِ اطلاعات و نشریات عطاء اللہ تارڑ، اراکینِ کمیٹی سینیٹر جان محمد بلیدی، سینیٹر سید وقار مہدی شرکت کیتی جݙاں جو سینیٹر پرویز رشید زوم لنک دے ذریعے اجلاس اچ شریک تھئے۔ ٻل دے محرک دی حیثیت نال سینیٹر محمد عبدالقادر وی اجلاس اچ موجود ہن، ایں نال قانون سازی دا عمل اڳوں ودھیا جیڑھا مستقبل اچ سود مند ثابت تھیسی۔