زرعی تحقیقاتی نظام اچ جامع اصلاحات دا آغاز، وفاقی وزیر رانا تنویر حسین دی زیرِ صدارت اجلاس

اسلام آباد۔ 11 مارچ (اے پی پی) وفاقی وزیر برائے قومی غذائی تحفظ تے تحقیق رانا تنویر حسین بدھ کوں ہک اعلیٰ سطحی اجلاس دی صدارت کیتی جیندے اچ چیئرمین پی اے آر سی ڈاکٹر سید مرتضیٰ حسن اندرابی شریک ہن۔ اجلاس اچ پاکستان دے زرعی تحقیقاتی نظام اچ جامع اصلاحات تے ڳالھ کیتی ڳئی۔ رانا تنویر حسین ملک اچ تحقیقاتی اداریاں کوں جدید بین الاقوامی معیار دے مطابق بݨاوݨ، پیداوار ودھاوݨ تے برآمدات دے فروغ کیتے انھاں دی فوری لوڑح تے زور ݙتا۔ انھاں آکھیا جو وفاقی تے صوبائی اداریاں وچال اختیارات دے دہراؤ کارکردگی اچ کمی پیدا کیتی اے۔ تحقیق کوں کلھا کم کرݨ آلے نظام توں کڈھ تے کراس ڈسپلنری اپروچ اپݨاوݨی پوسی تانجو نتائج عملی طور تے مؤثر ہوون۔ انھاں ٹیکنالوجی ٹرانسفر تے کمرشلائزیشن کوں ودھاوݨ دی اہمیت تے وی زور ݙتا۔ چیئرمین ڈاکٹر اندرابی ݙسایا جو نظام اچ انسانی وسائل دی ڳھٹکی نال تحقیق دی صلاحیت متاثر تھئی اے۔ انھاں ڈیجیٹل NARIS پلیٹ فارم بݨاوݨ دی لوڑھ تے زور ݙتا جیہڑا ڈیٹا ریپوزٹری دے طور تے کم کریسی۔ حکمرانی کوں مضبوط بݨاوݨ کیتے بورڈ دی سائنسی مشاورتی کمیٹی بݨاوݨ دا اعلان کیتا ڳیا جیندے اچ 50 فیصد غیر ملکی ماہرین شامل ہوسن تانجو پاکستان دا نظام عالمی معیار دے مطابق ہووے۔ وفاقی وزیر آکھیا جو اصلاحات دے تحت سنٹرز آف ایکسیلنس قائم کیتے ویسن جیہڑے جدید زراعت تے توجہ کریسن، ایندے نال غذائی تحفظ یقینی تھیسی۔