حضرت علیؑ دی شجاعت لازوال تے تعلیمات ساݙے کیتے مشعلِ راہ ہن، وزیرِ اطلاعات پنجاب عظمیٰ بخاری

لاہور۔ 11 مارچ (اے پی پی) وزیرِاطلاعات و ثقافت پنجاب عظمیٰ بخاری یومِ شہادت حضرت علیؑ دے موقع تے آپݨے خصوصی بیان اچ آکھیا جو حضرت علیؑ دی شجاعت، بہادری تے جرات لازوال اے۔ انھاں آکھیا جو حضرت علیؑ دی تعلیمات ساݙے کیتے مشعلِ راہ ہن، رسول اللہﷺ حضرت علیؑ کوں علم دا شہر قرار ݙتا۔ عظمیٰ بخاری مزید آکھیا جو حضرت علیؑ دے طرزِ زندگی اساکوں کئی اہم سبق سکھائن، شہادت ویلھے وی انھاں نماز کوں ترجیح ݙتی، جیڑھی انھاں دی اعلیٰ اخلاقی و روحانی شخصیت دی عکاس اے۔وزیرِ اطلاعات ݙسایا جو یومِ علیؑ دے موقع تے پورے صوبے اچ سکیورٹی دے فول پروف انتظامات کیتے ڳئن۔ جلوس تے مجالسِ عزا دی سکیورٹی یقینی بݨاوݨ کیتے پنجاب پولیس دے افسر تے اہلکار مکمل چاق و چوبند ہن تے احسن طریقے نال آپݨے فرائض سرانجام ݙیندے پئن تاں جو عزاداران کوں ہر قسم دے خطرے توں محفوظ رکھیا ونڄ سڳے۔ عظمیٰ بخاری آکھیا جو سارے جلوس نمازِ مغرب توں پہلے ختم تھی ویسن، عوام توں اپیل اے جو او امن و امان قائم رکھݨ اچ پولیس تے انتظامیہ دے نال تعاون کرن، جیندے نال فضا پرامن رہسی۔