پاکستان اچ دالاں دی مضبوط ویلیو چین دے ذریعے غذائی تحفظ بہتر بݨاوݨ، غذائیت ودھاوݨ تے درآمدات تے انحصار اچ کمی ممکن اے، رانا تنویر حسین

اسلام آباد۔ 12 مارچ (اے پی پی) وفاقی وزیر قومی غذائی تحفظ و تحقیق رانا تنویر حسین آکھیے جو پاکستان اچ دالاں دی مضبوط ویلیو چین دے ذریعے غذائی تحفظ بہتر بݨاوݨ، غذائیت اچ ودھارا کرݨ تے درآمدات تے انحصار اچ کمی ممکن اے۔ انھاں ݙسایا جو ملک اچ دالاں دی سالانہ پیداوار تقریباً 0.7 توں 0.8 ملین ٹن اے جݙاں جو قومی ضرورت تقریباً 1.6 ملین ٹن اے جیں پاروں ٻہوں وݙی مقدار اچ دالاں درآمد کرݨیاں پوندن۔ انھاں آکھیا جے ایں شعبے اچ تقریباً 30 فیصد بہتری گھن آئی ونڄے تاں درآمدات اچ نمایاں کمی ممکن اے۔ انھاں زرعی تحقیق، بہتر بج، فصل کٹݨ دے بعد دے نقصاناں اچ کمی تے موثر پالیسی اصلاحات دی لوڑھ تے وی زور ݙتا۔ او اتھاں پالیسی ادارہ پائیدار ترقی (SDPI) اسلام آباد دے زیرِاہتمام منعقدہ سیمینار توں خطاب کریندے پئے ہن۔وفاقی وزیر آکھیا جو دالاں پروٹین دے سستے ذرائع اچ شمار تھیندن تے پائیدار زرعی نظام کیتے ٻہوں اہم ہن۔ انھاں آکھیا جو ایں شعبے کوں مضبوط بݨاوݨ نال نہ صرف کساناں کوں براہِ راست فیدہ تھیسی بلکہ قومی غذائی تحفظ وی یقینی بݨایا ونڄ سڳسی۔ انھاں آکھیا جو بہتر مارکیٹ معلومات، فصلاں دے محفوظ ذخیرے دی سہولتاں تے قومی معیار دے تعین نال ایں شعبے اچ سرمایہ کاری دے موقع ودھ سڳدن تے ہک مضبوط ویلیو چین بݨائی ونڄ سڳدی اے۔ایں موقع تے ایس ڈی پی آئی دے سربراہ ڈاکٹر عابد قیوم سلہری آکھیا جو دالاں دی اہمیت دے باوجود پالیسی مباحثیں اچ انھاں کوں ٻہوں عرصے تئیں مناسب توجہ کائنی ݙتی ڳئی حالانکہ غذائیت اچ انھاں دا کردار ٻہوں اہم اے۔ انھاں ݙسایا جو پاکستان اکنامک سروے موجب ماش دی پیداوار اچ 16.1 فیصد کمی آئی اے جݙاں جو مناسب ݙیکھ بھال نہ ہووݨ پاروں تقریباً 25 فیصد فصل ضائع تھی ویندی اے۔ پاکستان اچ آسٹریلیا دے ہائی کمشنر ٹموتھی کین آکھیا جو زراعت پاکستان تے آسٹریلیا وچال تعاون دا ہک اہم شعبہ اے۔ انھاں آکھیا جو چݨا تے مسور جہی فصلاں نہ صرف سستیاں ہن بلکہ زمین دی زرخیزی اچ وی اضافہ کریندن۔ اے سی آئی اے آر دے کنٹری ڈائریکٹر ڈاکٹر منور کاظمی تے کوئینز لینڈ یونیورسٹی دے ڈاکٹر راجندرا ادھیکاری وی دالاں دی پیداوار تے ویلیو چین اچ سرمایہ کاری دی اہمیت تے زور ݙتا۔