پاکستان اسلاموفوبیا دے تدارک کیتے عالمی کوششاں کوں اڳوں ودھاوݨ کیتے پرعزم اے، اسحاق ڈار

اسلام آباد۔15 مارچ (اے پی پی) نائب وزیراعظم و وزیر خارجہ سینیٹر محمد اسحاق ڈار آکھیے پاکستان اسلاموفوبیا دے تدارک کیتے عالمی کوششاں کوں اڳوں ودھاوݨ کیتے پرعزم اے۔ اسلاموفوبیا دے خلاف عالمی ڈینھ دے موقع تے اساں دنیا دے مسلماناں دے نال یکجہتی دا اظہار کریندوں تے مسلماناں دے خلاف تعصب، امتیازی سلوک، دشمنی تے تشدد مکاوں کیتے اپݨے غیر متزلزل عزم دا اعادہ کریندوں۔ اسلاموفوبیا دے خلاف عالمی ݙینھ دے موقع تے دفترِ خارجہ توں جاری اپݨے پیغام وچ نائب وزیراعظم و وزیر خارجہ سینیٹر محمد اسحاق ڈار آکھیا جو اسلامی تعاون تنظیم (او آئی سی) دے نال نیڑے تعاون دے ذریعے پاکستان اقوامِ متحدہ دی جنرل اسمبلی دے ایں تاریخی فیصلے وچ اہم کردار ادا کیتا جیندے تحت 15 مارچ کوں اسلاموفوبیا دے خلاف عالمی ݙینھ قرار ݙتا ڳیا۔ اے اقدام بین الاقوامی برادری دی طرفوں مذاہب، ثقافتاں تے تہذیباں وچال ہم آہنگی، برداشت تے پرامن بقائے باہمی کوں ودھارا ݙیوݨ دی کوششاں وچ ہک اہم سنگِ میل ثابت تھیا۔ انھاں آکھیا جو پاکستان اقوامِ متحدہ دی جنرل اسمبلی دی ہک ٻئی قرارداد دی منظوری وچ وی کلیدی کردار ادا کیتا جیندا مقصد اسلاموفوبیا دے تدارک کیتے عالمی کوششاں کوں مضبوط بݨاوݨ ہئی، جیندے وچ اقوامِ متحدہ دے ہک خصوصی ایلچی دی تقرری دی درخواست وی شامل ہئی۔ ایں ضمن وچ اساں مئی 2025 وچ اسلاموفوبیا دے خلاف اقوامِ متحدہ دے خصوصی ایلچی دی تقرری دا خیرمقدم کریندوں، ایویں مئی 2024 وچ او آئی سی دے سیکریٹری جنرل دے اسلاموفوبیا دے خلاف خصوصی ایلچی دی تقرری وی ایں چیلنج توں مربوط تے مستقل انداز وچ نبٹݨ کیتے ودھدے عالمی عزم دی عکاسی کریندی اے۔ محمد اسحاق ڈار آکھیا جو پاکستان سارے لکاں توں مطالبہ کریندے جو او معاشریں وچال سانجھے احترام، مکالمے تے افہام و تفہیم کوں ودھارا ݙیوݨ کیتے مسلسل اقدامات کرن۔