وفاقی وزیرِ داخلہ دی صدارت خصوصی اجلاس، وفود دی مزمان نوازی تے سکیورٹی دے ہر ممکن اقدامات دی ہدایت

اسلام آباد۔ 10 اپریل (اے پی پی):وزیرِ داخلہ محسن نقوی اسلام آباد مذاکرات کیتے آوݨ آلے وفود دی مزمان نوازی تے سکیورٹی کیتے ہر ممکن اقدامات یقینی بݨاوݨ دی ہدایت کیتی اے۔ اسلام آباد مذاکرات کیتے غیر ملکی وفود دی آمد دے سلسلے اچ وفاقی وزیرِ داخلہ محسن نقوی دی صدارت وزارتِ داخلہ اچ سکیورٹی تے ٻئے انتظامات بارے خصوصی اجلاس تھیا۔ اجلاس اچ اسلام آباد اچ امریکہ ایران مذاکرات دے حوالے نال تیاریاں تے سکیورٹی پلان دا تفصیلی جائزہ گھدا ڳیا۔ وزیرِ داخلہ محسن نقوی غیر ملکی مہماناں کیتے ہر سطح تے بہترین انتظامات دی ہدایت کیتی ۔ وزیرِ داخلہ محسن نقوی آکھیا جو جنگ بندی دے بعد امریکہ ایران مذاکرات دا اسلام آباد اچ تھیوݨ پاکستان کیتے ہک اعزاز دی ڳالھ اے۔ اجلاس اچ فیصلہ کیتا ڳیا جو ریڈ زون کوں مکمل سیل کیتا ویسی اتے صرف متعلقہ لوکاں کوں داخلے دی اجازت ہوسی جݙاں جو ایں بارے وزارتِ داخلہ دا مرکزی کنٹرول روم قائم کر ݙتا ڳئے۔ اجلاس اچ وزیرِ مملکت داخلہ طلال چوہدری، وفاقی سیکرٹری داخلہ، چیف کمشنر، آئی جی اسلام آباد پولیس، کمشنر راولپنڈی، ڈی جی ایف آئی اے، ڈی سی اسلام آباد، رینجرز، فیڈرل کانسٹیبلری تے وزارتِ خارجہ دے نمائندیاں شرکت کیتی۔