چیئرمین سینیٹ سید یوسف رضا گیلانی دی پاکستان ویمنز فٹبال ٹیم کوں فیفا سیریز 2026 اچ نمایاں کامیابی تے دلی مبارکباد

اسلام آباد۔ 11 اپریل (اے پی پی) چیئرمین سینیٹ سید یوسف رضا گیلانی پاکستان ویمنز فٹبال ٹیم کوں فیفا سیریز 2026 اچ نمایاں کامیابی تے دلی مبارکباد پیش کیتی اے۔ اتھاں جاری تھئیے بیان دے مطابق انھاں قومی تریمت فٹبال ٹیم دی شاندار کارکردگی کوں قابلِ تحسین قرار ݙیندیں ہوئیں آکھیا جو ایں کامیابی عالمی سطح تے پاکستان دا ناں روشن کیتے ۔ چیئرمین سینیٹ آکھیا جو 8-0 دی شاندار فتح قومی تریمت کھڈاریاں دی محنت، لگن تے غیر معمولی صلاحیتاں دا واضح ثبوت اے۔ انھاں آکھیا جو ویمنز ٹیم عمدہ کھیݙ پیش کریندے ہوئیں نہ صرف ملک دے وقار اچ ودھارا کیتے بلکہ تریمتاں دے کھیݙاں دے فروغ کیتے ہک نویں امید تے حوصلہ وی پیدا کیتے۔ انھاں آکھیا جو پاکستانی تریمتاں دا کھیݙاں دے میدان اچ ودھدا ہویا کردار ٻہوں حوصلہ افزا اے تے ایں کامیابی توں نوجوان نسل، خصوصاً چھوہریاں کوں اڳوں ودھݨ دا حوصلہ ملسی ۔ چیئرمین سینیٹ ایں عزم دا اظہار کیتا جو تریمتاں دے کھیݙاں دے فروغ تے نویں ٹیلنٹ دی حوصلہ افزائی ضروری اے تانجو ملک اچ کھیݙاں دا شعبہ ٻیا مضبوط تھی سڳے ۔ سید یوسف رضا گیلانی آکھیا جو فیفا سیریز اچ اے کامیابی مستقبل اچ ٻئی کامیابیاں دی بنیاد ثابت تھیسی۔ انھاں آکھیا جو پوری قوم آپݨی دھیریں دی ایں کامیابی تے فخر کریندی اے۔