امریکہ تے ایران وچال مذاکرات کامیاب تھیسن، سید یوسف رضا گیلانی

ڈیرہ غازی خان۔ 11 اپریل (اے پی پی) چیئرمین سینیٹ سید یوسف رضا گیلانی آکھیا جو دنیا دی سپر پاور امریکہ تے ایران وچال مذاکرات کامیاب تھیسن، دنیا دے سامݨے پاکستان دی قدر اچ ٻیا ودھارا تھیسی۔ سردار ذوالفقار علی خان کھوسہ ملک دا قیمتی اثاثہ ہن۔ انھاں اے ڳالھیں ہفتہ دے ݙینہہ کھوسہ ہاؤس اچ سردار ذوالفقار علی خان کھوسہ دی وفات تے تعزیت دے موقع تے میڈیا نال ڳالھ مہاڑ کریندیں ہوئیں کیتا۔ سید یوسف رضا گیلانی آکھیا جو میݙے ڈیرہ غازی خان آوݨ دا مقصد سردار ذوالفقار علی خان کھوسہ دی وفات تے انھاں دے اہل خانہ نال اظہارِ تعزیت کرݨ اے۔ سردار ذوالفقار علی کھوسہ ملک دا قیمتی اثاثہ ہن اتے انھاں دے صاحبزادیاں دا وی ملکی سیاست اچ اہم کردار اے۔ انھاں آکھیا جو میݙی سردار ذوالفقار علی کھوسہ نال پراݨی وابستگی ہئی اتے میں دعا گو ہاں جو اللہ پاک مرحوم دے درجات کوں بلند فرماوے۔ امریکہ ایران جنگ دے حوالے توں سید یوسف رضا گیلانی دا آکھݨ ہئی جو اللہ پاک پاکستان کوں وݙا مقام عطا فرمائے اتے او خطے اچ امن دی خاطر کلیدی کردار ادا کریندا پئے۔ انھاں آکھیا جو پاکستان دنیا دی سپر پاور تے ایران وچال صلح دی بھرپور کوشش کریندا پئے اتے میں پرامید ہاں جو مذاکرات دا اے سلسلہ نتیجہ خیز ثابت تھیسی تے کامیاب تھیسی۔ انھاں آکھیا جو گزشتہ ݙینہاں پاکستانی افواج، خصوصی طور تے ایئر فورس بھارت کوں منہ ٻھن جواب ݙے تے آپݨی صلاحیتاں دا لوہا منوائے۔ ایندے توں پہلے چیئرمین سینیٹ کھوسہ ہاؤس پڄے تاں سردار دوست محمد خان کھوسہ، سردار حسام الدین کھوسہ تے سردار سیف الدین کھوسہ انھاں دا استقبال کیتا ۔ ایں موقع تے سید یوسف رضا گیلانی سردار ذوالفقار علی خان کھوسہ دے لواحقین نال اظہارِ تعزیت کیتا اتے مرحوم دے درجات دی بلندی کیتے دعا کیتی۔