پروفیسر احسن اقبال دی صدارت نیشنل پرائس مانیٹرنگ کمیٹی دا آن لائن اجلاس، ٹرانسپورٹ کرایاں تے سپلائی چین دی صورتحال دا جائزہ گھدا

اسلام آباد۔ 11 اپریل (اے پی پی) وفاقی وزیر برائے منصوبہ بندی، ترقی تے خصوصی اقدامات پروفیسر احسن اقبال دی صدارت نیشنل پرائس مانیٹرنگ کمیٹی دے آن لائن اجلاس اچ ملک بھر اچ اشیائے ضروریہ دی قیمتاں، ٹرانسپورٹ کرایاں تے سپلائی چین دی صورتحال دا تفصیلی جائزہ گھدا ڳیا۔ وزارتِ منصوبہ بندی دے مطابق اجلاس کوں بریفنگ دے دوران ادارہٴ شماریات ݙسیا جو حکومتی سبسڈی دے باعث ٹرانسپورٹ اخراجات اچ نمایاں ڳھٹکی ݙیکھݨ اچ آئی اے جݙاں جو کئی شہراں اچ کرایاں اچ 20 توں 30 فیصد تئیں ڳھٹکی ریکارڈ کیتی ڳئی اے۔ کراچی اچ ٹرانسپورٹ کرایاں اچ ودھارے دا نوٹس گھندیں ہوئیں وفاقی وزیر سندھ حکومت کوں فوری کارروائی دی ہدایت کیتی اے۔ اعداد و شمار دے مطابق گزشتہ ہفتے دے دوران 8 اشیائے ضروریہ دی قیمتاں اچ ڳھٹکی جݙاں جو 28 اشیاء دی قیمتاں اچ ودھارا ریکارڈ کیتا ڳئے۔ تھوم ، کیلیاں، چکن تے اٹے دی قیمتاں اچ بالترتیب 3.78 فیصد، 3.39 فیصد، 1.05 فیصد تے 0.73 فیصد ڳھٹکی تھئی اے، جݙاں جو ڈیزل، پٹرول، ٹماٹر، ایل پی جی تے آلو دی قیمتاں اچ نمایاں ودھارا ݙیکھݨ اچ آئے۔ ادارہٴ شماریات دے مطابق حساس قیمت اشاریہ (SPI) اچ مجموعی طور تے استحکام ریہا تے حالیہ ہفتے اچ اے شرح 1.93 فیصد ریکارڈ کیتی ڳئی اے۔ گھیؤ تے کھاوݨ آلے تیل دی قیمتاں وی مستحکم رہین، جݙاں جو عالمی سطح تے فرٹیلائزر دی قیمتاں اچ ودھارے دے باوجود ملک اچ قیمتاں قابو اچ رہون۔ اجلاس اچ کجھ شہراں، بالخصوص کراچی اچ تھوک تے پرچون قیمتاں اچ نمایاں فرق تے وی تشویش دا اظہار کیتا ڳیا، جتھاں ٹماٹر تے آلو دی قیمتاں اچ بالترتیب 142 فیصد تے 117 فیصد تائیں فرق ݙٹھا ڳئے۔ وفاقی وزیر صوبائی حکومتاں کوں ہدایت کیتی جو او تھوک تے پرچون قیمتاں اچ توازن یقینی بݨاون۔ وزیرِ منصوبہ بندی احسن اقبال متعلقہ حکام کوں منافع خوری تے ذخیرہ اندوزی دے خلاف سخت کارروائی کرݨ، فرٹیلائزر دی بلا تعطل فراہمی یقینی بݨاوݨ تے آوݨ آلی فصلاں دی بیڄائی پاروں کھاد دی دستیابی ہر صورت برقرار رکھݨ دی ہدایت کیتی اے۔ انھاں قیمتاں دے اتار چڑھاؤ تے کڑی نگرانی رکھݨ تے مانیٹرنگ نظام کوں ٻیا مؤثر بݨاوݨ تے وی زور ݙتے۔