مذاکرات اچ نیک نیتی نال شرکت کیتی، اساں آپݨی ریڈ لائن واضح کر ݙتی اے جو کیندی گنجائش اے اتے کیندی کائنا، امریکی نائب صدر جے ڈی وینس دی میڈیا نال ڳالھ مہاڑ

اسلام آباد۔ 12 اپریل (اے پی پی) امریکی نائب صدر جے ڈی وینس مذاکرات دی بہترین میزبانی تے پاکستان دا شکریہ ادا کریندیں ہوئیں تے کہیں حتمی نتیجے تے نہ پڄݨ کوں امریکہ تے ایران ݙوہیں کیتے بری خبر قرار ݙیندیں ہوئیں آکھیا جو ایران کوں بہترین پیشکش ݙے تے واپس ویندے پئن ، ݙیکھدوں جو ایران کیا جواب ݙیندے ۔ 21 گھنٹے ایرانی وفد دے نال کئی تے اہم معاملات تے تفصیلی ڳالھ مہاڑ تھئی اے۔ اساں آپݨی ریڈ لائن واضح کر ݙتی اے، اساݙا بنیادی ہدف اے جو ایران ایٹمی ہتھیار حاصل نہ کرے ۔ شاندار میزبانی تے وزیراعظم محمد شہباز شریف تے فیلڈ مارشل سید عاصم منیر دے شکر گزار ہیسے، انھاں مذاکرات کامیاب کراوݨ تے ݙوہیں ملکاں وچال فاصلے گھٹ کراوݨ کیتے شاندار کوشِشاں کیتن۔ جے ڈی وینس آکھیا جو 21 گھنٹیاں اچ ایرانی وفد نال تفصیلی ڳالھ مہاڑ تھئی اے۔ اے چنڳی خبر اے اتے بری خبر اے جو اساں کہیں سمجھوتے تے نئی پڄیے اتے میݙے خیال اچ اے امریکہ توں وی ودھ ایران کیتے بری خبر اے۔ انھاں آکھیا جو اساں کہیں معاہدے دے بغیر امریکہ واپس ویسوں ، اساں آپݨی شرائط واضح طور تے پیش کیتن۔ ایران کوں آکھیے جو اساݙی تجاویز تسلیم کر گھنن ۔ انھاں آکھیا جو واضح یقین دہانی دی لوڑھ اے جو ایران جوہری ہتھیار نہ بݨیسی۔