بیساکھی دا تہوار محنت دا پھل ملݨ تے عاجزی نال شکر گزاری دا سنیہا ݙیندے، وزیراعظم

اسلام آباد۔ 14 اپریل(اے پی پی)وزیراعظم محمد شہباز شریف پنجاب دے روایتی، ثقافتی اتے سکھ برادری دے مذہبی تہوار بیساکھی تے پاکستان اتے ڄڳ اچ مقیم سکھ برادری اتے ایں ݙینہہ کوں مناوݨ آلیاں کوں مبارکباد ݙیندے آکھیے جو اے تہوار محنت دا پھل ملݨ تے عاجزی نال شکر گزاری دا سنیہا ݙیندے۔ بیساکھی تے اپݨے سنیہے اچ وزیراعظم آکھیا جو روایتی اتے ثقافتی سطح تے کسان دی سخت محنت دے بعد فصل دے بار آور تھیوݨ تے کٹائی کیتے تیار تھیوݨ دی خوشی اچ پنجاب اچ سکھ برادری بیساکھی دا میلہ کریندی اے۔ انھاں آکھیا جو اے تہوار انسانیت دے مثبت پہلو اتے محنت دے صبر آزما مراحل دے بعد ثمرات تے خوشی دا اظہار اے، اے محنت دا پھل ملݨ تے عاجزی نال شکر گزار تھیوݨ دا سنیہا ݙیندے۔ دنیا بھر توں سکھ یاتری پاکستان دے گردوارہ پنجہ صاحب (حسن ابدال) اتے جنم استھان (ننکانہ صاحب) اچ بیساکھی دی تقریبات اچ شرکت کیتے آندن۔ حکومت آوݨ آلے سارے سکھ اتے ہندو یاتریاں کوں ہمیشہ خوش آمدید آھدی اے، تہوار دے ݙینہاں اچ مذہبی مقامات اتے سکھ یاتریاں دی ہر ممکن سہولت کیتے اقدامات کیتے ویندن۔ وزیراعظم آکھیا جو مثبت اتے کثیر الجہتی ثقافتی رنگ ہی معاشرتی تنوع اتے زندہ دل معاشرے دی بنیاد اے۔ انھاں آکھیا جو اسلامی تعلیمات تے آئینِ پاکستان بلا تفریق رنگ و مذہب سارے شہریاں دے مساوی حقوق دے تحفظ اتے مذہبی آزادی دے ضامن ہن۔ انھاں آکھیا جو آؤ اڄ خوشی دے ݙینہہ عالمی امن و استحکام اتے فلاحِ انسانیت کیتے وی خصوصی دعا کروں، تہاکوں بیساکھی دیاں خوشیاں مبارک ہوون۔