بلوچستان دے استحکام دے بغیر پاکستان اڳو تے نئیں ودھ سڳدا، صدر مملکت آصف علی زرداری

اسلام آباد۔14 اپریل(اے پی پی)صدر مملکت آصف علی زرداری بلوچستان دے مسائل دے حل کیتے مکالمے، بہتر طرزِ حکمرانی اتے موثر آبی نظم و نسق تے زور ݙیندے آکھیے جو صوبے دے استحکام اتے ترقی دے بغیر پاکستان اڳو تے نعیں ودھ سڳدا۔ انھاں اے ڳالھ ایوان صدر اسلام آباد اچ 19 ویں نیشنل ورکشاپ برائے بلوچستان دے شرکاء نال خطاب اچ آکھی۔ تقریب اچ وفاقی وزیر خالد مگسی، راجہ پرویز اشرف، سردار یار محمد رند اے ٻیاں شخصیات شرکت کیتی۔ صدر مملکت آکھیا جو بلوچستان معدنی وسائل نال مالا مال اے ٻھل ایکوں طویل المدتی ترقیاتی منصوبیاں دی ضرورت اے۔ انہاں پاݨی کوں ہک اہم مسئلہ قرار ݙیندے ہوئیں آکھیا جو نہراں دی لائننگ دے منصوبیاں تے عمل کیتا ویندا پئے تاں جو پاݨی دے ضیاع کوں گھٹ کیتا ونڄے۔ صدر زرداری گوادر بندرگاہ بارے آکھیا جو انھاں دا وژن اے ہے جو بندرگاہ دی ترقی دے ثمرات مقامی قبائل تئیں پڄن، جنگ مسائل دا حل کائنی، مکالمہ اتے جمہوری عمل ہی اڳوں ودھݨ دا کلہا رستہ اے۔ صدر آکھیا جو بلوچستان دے عوام کوں سی پیک دے مواقع توں بھرپور فائدہ چاوݨا چاہیدے۔ انہاں غیر ملکی شہریاں تے حملیاں کوں افسوسناک قرار ݙیندے آکھیا جو اے پاکستان دے مفادات کیتے نقصان دہ ہن۔ ایں توں پہلے بریگیڈیئر بلال غفور ورکشاپ دے اغراض و مقاصد ݙسدیندے آکھیا جو ایندے اچ بلوچستان سودھا پورے ملک توں 93 افراد شریک ہن۔ صدر مملکت ایں موقع تے شرکاء دے سوالات دے جوابات وی ݙتے۔