وزیر اعظم دی ایف بی آر کوں اوور انوائسنگ دے خلاف کارروائی تیز کرݨ دی ہدایت

اسلام آباد۔15اپریل(اے پی پی)وزیر اعظم محمد شہباز شریف 2017ء توں 2022ء تئیں اوور انوائسنگ دے مکروہ دھندے اچ ملوث سارے لوکان دے خلاف قانونی کارروائی تیز تر کرݨ دی ہدایت کریندے متعلقہ اداریاں دی مسلسل غفلت تے برہمی ݙکھائی اے۔ او اسلام اباد اچ ایف بی آر دے امور بارے ہفتہ وار  جائزہ اجلاس دی اڳواݨی کریندے پئے ہن جیندے اچ اوور انوائسنگ سانڳے ٻݨائی گئی کمیٹی دی رپورٹ پیش کیتی گئی ۔ وزیر اعظم آفس دے میڈیا ونگ دے جاری بیان دکے مطابق اجلاس اچ وفاقی وزراء مصدق مسعود ملک،  احد خان چیمہ، عطاء اللہ تارڑ،  اٹارنی جنرل منصور عثمان اعوان،  وزیر مملکت برائے خزانہ بلال اظہر کیانی، چیئرمین ایف بی آر اتے اعلی سرکاری حکام شریک تھئن۔ وزیر اعظم اجلاس نال خطاب اچ آکھیے جو 2017ء توں 2022ء دے دوران اوور انوائسنگ دا مکروہ دھندا چلدا رہے اتے متعلقہ ادارے اپݨے فرائض نٻھاون دی بجائے ستے رہین۔ انہاں ہدایت کیتی جو اوور انوائسنگ دے دھندے اچ ملوث سارے لوکاں دے خلاف قانونی کارروائی تیز کرن۔ وزیراعظم شہبازشریف، مشتاق احمد سکھیرا دی اڳواݨی اچ ٻݨائی ڳئی کمیٹی دی رپورٹ دی تعریف کریندے غفلت ورتݨ آلے لوکاں دا تعین کرݨ اتے انہاں دے خلاف محکمانہ کارروائی دی ہدایت کیتی۔ انہاں آکھیا جو ٹیکس دا پیسہ قوم دی امانت اے، ایندی حفاظت ساݙا فرض اتے ہک ہک پیسے دا حساب ݙیوݨ ذمہ داری اے۔ انہاں انڄھے واقعات کوں مستقبل اچ روکݨ کیتے جامع حکمت عملی ٻݨاوݨ دی وی ہدایت کیتی۔ انہاں فنانشل مانیٹرنگ یونٹ(ایف ایم یو) کوں ہک فعال ادارہ ٻݨاوݨ اتے ایندے اچ ایف آئی اے اتے انٹیلیجنس بیورو دے نمائندے رلاوݨ دی وی ہدایت کیتی۔ وزیر اعظم کوں ݙسایا ڳیا جو ایف بی ار سنٹرلائز پرائس ویریفکیشن پورٹل ٻݨائے، جون دے آخر تک اے پورٹل  بینکاں نال جڑ ویسی۔ وزیر اعظم کوں ݙسایا گیا جو رپورٹ دے مطابق ایف بی آر دے پوسٹ کلیئرنگ آڈٹ ونگ اکتوبر 2022ء اچ ایں اوور انوائسنگ دھندے دی نشاندہی کیتی۔ ایں دوران مرتکب افراد دے خلاف 13 ایف آئی آرز درج تھی چکین اتے قانونی کارروائی جاری اے۔