خیبر پختونخوا، کشمیر تے گلگت بلتستان اچ بارشاں، لینڈ سلائیڈنگ دا امکان، محکمہ موسمیات

اسلام آباد: 15 اپریل(اے پی پی)محکمہ موسمیات چتاوݨی ݙتی اے جو 16 اپریل توں 18 اپریل تئیں تیز بارشاں پاروں بالائی خیبر پختونخوا، کشمیر اتے گلگت بلتستان دے پہاڑی علاقیاں اچ لینڈ سلائیڈنگ اتے مقامی ندی نالے بپھرݨ دا خطرہ اے۔ ݙسایا ڳئے جو 16 اپریل توں 18 اپریل تئیں تیز ہواواں، اندھاری، جھکڑ، نناواں پووݨ اتے آسمانی بجلی کڑکݨ نال کمزور بجلی دے کھمبے، بل بورڈز، سولر پینلز وغیرہ کوں نقصان پڄ سڳدے۔ ایں دوران بالائی پنجاب اتے خیبر پختونخوا اچ کھڑی تیار فصلاں کوں وی نقصان پڄݨ دا چنتا اے۔ محکمہ موسمیات آکھیے جو خمیس کوں ملک دے اکثرا علاقیاں اچ موسم خشک ڄݙاں جو میدانی علاقیاں اچ ݙینھ ویلھے ٻہوں گرم رہݨ دی توقع اے ٻھل شام اتے رات کوں خیبر پختونخوا، پنجاب،اسلام آباد، کشمیر ، گلگت بلتستان اتے شمال مشرقی بلوچستان اچ تیز ہوائیں/ آندھاری اتے کھمݨ ڳاڄ نال کڄھ ڄاہیں تے مینہ وسݨ اتے نناواں پووݨ دا امکان اے۔ ایں دوران بالائی خیبر پختونخوا اچ کڄھ ڄاہیں تے وچلی توں تیز بارش دا امکان اے۔ پچھلے چوی ڳھنٹے اچ ملک دے اکثرا علاقیاں اچ موسم خشک ڄݙاں جو میدانی علاقیاں اچ گرم رہے ٻھل پاراچنار اچ 02 ملی میٹر بارش ریکارڈ کیتی گئی۔ بدھ کوں ریکارڈ کیتے گئے ودھ توں ودھ درجہ حرارت: مٹھی 45، موہنجوداڑو، شہید بینظیر آباد، چھور اتے دادو اچ 43 ڈگری سینٹی گریڈ ریکارڈ کیتا گیا ۔