راولپنݙی۔15 اپریل(اے پی پی)فیلڈ مارشل و آرمی چیف سید عاصم منیر دی اڳواݨی اچ پاکستان دا اعلیٰ سطح وفد امریکا ایران مذاکرات دی بحالی کیتے تہران پڄ ڳئے۔ پاک فوج دے شعبہ تعلقات عامہ(آئی ایس پی آر) ݙسائے جو فیلڈ مارشل سید عاصم منیر تہران پڄ ڳئن جتھاں ایرانی وزیرخارجہ عباس عراقچی فیلڈ مارشل سید عاصم منیر دا استقبال کیتے۔ آئی ایس پی آر موجب فیلڈ مارشل دا اے دورہ …
امریکا ایران مذاکرات بحالی: فیلڈ مارشل سید عاصم منیر پاکستان دا اعلیٰ سطح وفد ڳھن تے تہران پڄ ڳئن
راولپنݙی۔15 اپریل(اے پی پی)فیلڈ مارشل و آرمی چیف سید عاصم منیر دی اڳواݨی اچ پاکستان دا اعلیٰ سطح وفد امریکا ایران مذاکرات دی بحالی کیتے تہران پڄ ڳئے۔ پاک فوج دے شعبہ تعلقات عامہ(آئی ایس پی آر) ݙسائے جو فیلڈ مارشل سید عاصم منیر تہران پڄ ڳئن جتھاں ایرانی وزیرخارجہ عباس عراقچی فیلڈ مارشل سید عاصم منیر دا استقبال کیتے۔ آئی ایس پی آر موجب فیلڈ مارشل دا اے دورہ مصحالتی کوششاں دا حصہ اے ڄݙاں جو وزیر داخلہ محسن نقوی وی فیلڈمارشل دے نال ہین۔ ٻئے پاسو عرب میڈیا رپورٹ کیتے جو پاکستان دا ہک اعلیٰ سطح وفد ایران پڄ ڳئے جتھاں او امریکا اتے ایران وچال مذاکرات دی بحالی بارے اہم معاملیاں تے ڳالھ مہار کریسی۔ اے دورہ اوں ویلھے تھیندا پئے ڄݙاں امریکا اتے ایران وچال پہلے مذاکرات توں بعد ولا ڳالھ مہاڑ کراوݨ اتے کٹھے ٻلھاوݨ دی کوشش جاری اے۔ ایں توں پہلے ایرانی وزارت خارجہ دے ترجمان اسماعیل بقائی ݙسایا ہا جو پاکستان دے ذریعے امریکا نال سنیہے ونݙیندے پئن اتے ایں سانڳے ایران اڄ پاکستان وفد دی میزبانی کریندا پئے۔ ایرانی میڈیا دا آکھݨ اے جو امریکا ایران مذاکرات دا ݙوڄھا دور کڄھ ݙینہ اچ ولا پاکستان دے دارالحکومت اسلام آباد اچ متوقع اے جیندے کیتے فضا ہموار کیتی ویندی پئی اے۔
