خیبرپختونخوا دے علاقے حسن خیل اچ ایف سی تے بزدلانہ حملہ ناکام، اٹھ خوارجی دہشت گرد جہنم واصل، ایف سی دے 6 جوان شہید

اسلام آباد۔ 10 جون (اے پی پی) خیبرپختونخوا دے علاقے حسن خیل اچ فیڈرل کانسٹیبلری تے بزدلانہ حملہ ناکام بݨا ݙتا ڳیا، فیڈرل کانسٹیبلری دے 6 جوان بہادری نال لڑدیں ہوئیں مادرِ وطن تے قربان تھی ڳئے، سکیورٹی فورسز دی جوابی کارروائی اچ آٹھ خوارجی دہشت گرد وی جہنم واصل کر ݙتے ڳئے۔ ذرائع دے مطابق شہید تھیوݨ آلے اہلکاراں اچ نائیک عامر شہید، لانس نائیک محمد یوسف شہید، لانس نائیک محمد ریاض شہید، سپاہی اجمیر شہید، احسان شہید تے ریاض شہید شامل ہن۔ شہید اہلکاراں دی نمازِ جنازہ ادا کر ݙتی ڳئی اے جئیں اچ وفاقی وزیرِ داخلہ محسن نقوی، وزیرِ مملکت برائے داخلہ طلال چوہدری تے اعلیٰ پولیس افسراں شرکت کیتی۔ وفاقی وزیرِ داخلہ تے وزیرِ مملکت برائے داخلہ شہداء دے اہلخانہ نال اظہارِ ہمدردی کریندیں ہوئیں آکھیے جو شہداء دی قربانیاں رائیگاں نہ ویسن، قوم بہادر سپوتاں دی ایں عظیم قربانی کوں ہمیشہ یاد رکھیسی۔ وزیرِ داخلہ محسن نقوی آکھیے جو شہداء دے اہلخانہ دے ݙکھ اچ برابر دے شریک ہیسے، انھاں کوں کلہا نہ چھوڑیسوں۔ وزیرِ مملکت طلال چوہدری آکھیے جو پوری قوم دہشت گردی دے خلاف متحد تے ہک مٹھ اے۔ ذرائع دے مطابق حملہ ایجھے ویلھے تھئے جݙاں پاکستان مسلسل افغان سرزمین دے پاکستان دے خلاف استعمال تھیوݨ توں روکݨ دا مطالبہ کریندا پئے۔ دہشت گرداں دا حملہ واضح ثبوت اے جو فتنہ الخوارج تے ٻیاں دہشت گرد تنظیماں دے محفوظ ٹکاݨے افغانستان اچ موجود ہن۔ دفاعی ماہرین دے مطابق پاکستان، افغانستان اچ دہشت گرداں دے ٹکاݨیاں آلے پاسے کئی واری افغان عبوری حکومت دی توجہ مبذول کروا چکیے۔ افغانستان اچ فتنہ الخوارج (ٹی ٹی پی) نال وابستہ دہشت گرد عناصر دی موجودگی، انھاں دی سہولت کاری تے منصوبہ بندی توں انکار نئی کیتا ونڄ سڳدا۔ حملے کوں ناکام بݨا تے سکیورٹی فورسز اے واضح سنیھا ݙتے جو پاکستان دہشت گردی دے خلاف آپݨی جنگ اچ پرعزم اے، آپریشن غضب للحق افغانستان اچ موجود آخری دہشت گرد دے خاتمے تئیں جاری رہسی۔