معاشی بہتری، روزگار دے مواقع، برآمدات تے پیداواری صلاحیت اچ اضافہ سانجھی ذمہ داری اے، زیادہ توں زیادہ وسائل پیدا کرݨ اتے دفاع کیتے وسائل دی فراہمی اساݙی ترجیح اے، وزیراعظم شہباز شریف دا قومی اقتصادی کونسل دے اجلاس توں خطاب

اسلام آباد۔ 10 جون (اے پی پی) وزیراعظم محمد شہباز شریف معاشی بہتری، روزگار دے مواقع، برآمدات تے پیداواری صلاحیت اچ اضافے کوں مشترکہ ذمہ داری قرار ݙیندیں ہوئیں آکھیے جو آج میکرو سطح تے معیشت مستحکم اے، وفاق ہر معاملے تے انتہائی سنجیدگی دے نال صوبیاں توں مشاورت کیتی اے، ٹیم ورک دے طور تے پاکستان دے بہترین مفاد اچ قومی فیصلے کیتن، زیادہ توں زیادہ وسائل پیدا کرݨا تے دفاع کیتے وسائل دی فراہمی تے ایںکوں مضبوط بݨاوݨ اساݙی ترجیح اے، تیل دی قیمتاں دی مد اچ عوام کوں 128 ارب روپے دا ریلیف فراہم کیتا، باہمی اتحاد تے اتفاق نال دہشت گردی دا مکمل صفایا کریسوں۔ اے ڳالھیں انہاں بدھ کوں قومی اقتصادی کونسل (این ای سی) دے اجلاس توں خطاب کریندیں ہوئیں کیتا۔ وزیراعظم اجلاس اچ سندھ، خیبر پختونخوا تے بلوچستان دے وزرائے اعلیٰ دا خیرمقدم کیتا اتے آکھیے جو پنجاب دی وزیرِ اعلیٰ مریم نواز علالت دے باعث اجلاس اچ شریک کائنی، اللہ تعالیٰ انھاں کوں صحتِ کاملہ عطا فرماوے۔  وزیراعظم آکھیے جو آج اساں این ای سی دے فورم تے کٹھے ہیسے، سارے صوبائی وزرائے اعلیٰ دا شکر گزار ہاں جو انھاں ایں سارے عرصے اچ ہر موقع تے مشاورت تے معاونت کیتی جڈانجو وفاق نے انتہائی خلوص تے سنجیدگی دے نال صوبیاں دے نال ہر معاملے تے مشاورت کیتی تے قومی مفاد اچ بہترین فیصلے کیتن، ایہووجہ اے جو آج اساݙی معیشت ایں دے باوجود جو وݙے وݙے چیلنجز دا اساکوں سامنا کرݨا پیا، میکرو سطح تے مستحکم اے لیکن ہݨ شرح نمو اچ اضافہ انتہائی اہم مرحلہ اے، روزگار دے مواقع، پیداواری صلاحیت تے برآمدات اچ اضافہ تے اقتصادی سرگرمیاں دا فروغ ساریاں دی مشترکہ ذمہ داری اے۔ وزیراعظم آکھیے جو مشکلاں دے باوجود کوشش کیتی جو آئی ایم ایف پروگرام تے عمل پیرا رہوں، حالیہ بحران دی وجہ توں تیل دیاں قیمتاں اسمان تے پڄ ڳئن، اے ہک بہت وݙا چیلنج ہئی، وفاق تے صوبیاں وچال ہم آہنگی دے بغیر ایں مشکل صورتحال کوں ٹالیا نئی ونڄ سڳدا ہئی، ایں حوالے توں وی وزرائے اعلیٰ دا دل دیاں گہرائیاں توں مشکور ہاں جو انھاں بھرپور تعاون کیتا، تیل دیاں قیمتاں دی مد اچ 128 ارب روپے وفاق آپݨے انتہائی محدود وسائل توں خرچ کیتے، دنیا دے کئی ملکاں اچ پٹرول پمپاں تے لائناں ݙیکھݨ اچ آئیاں لیکن بروقت اقدامات دی وجہ توں پاکستان اچ عوام کوں پٹرول دستیاب رہیا، اساں عوام دی توقعات تے پورا لہݨ دی ہر ممکن کوشش کیتی، اے سبھ چاریں صوبیاں تے وفاق دی باہمی یگانگت، ہم آہنگی تے ٹیم ورک دا نتیجہ ہئی۔ وزیراعظم آکھیے جو بجٹ دے حوالے توں پچھلے کئی ہفتیاں توں صوبیاں دے نال بھرپور مشاورت جاری ہئی، صوبیاں دے نال ٻئے وسائل پیدا کرݨ دے حوالے توں مشاورت تھئی، زیادہ توں زیادہ وسائل پیدا کرݨا تے دفاع کیتے وسائل دی فراہمی تے ایں کوں مضبوط بݨاوݨ اساݙی ترجیح اے، دہشت گردی دے خاتمے کیتے پوری قوم قربانیاں ݙیندی پئی اے، خاص طور تے صوبہ خیبر پختونخوا تے بلوچستان دے عوام، ماواں، ٻھیݨیں تے جوان پتر، قانون نافذ کرݨ آلے اداریاں دے افسراں تے اہلکار تے اساݙی مسلح افواج دے جوان تے افسر ݙینھ رات قربانیاں ݙیندے پئن، اتحاد تے اتفاق نال دہشت گردی دا قلع قمع کریسوں اتے ایں دا مکمل صفایا تھیسی۔ وزیراعظم آکھیے جو میکرو سطح تے معیشت مستحکم اے لیکن عام آدمی کوں روزگار دے مواقع، زرعی و صنعتی ترقی نال دلچسپی اے جو اساں مختلف شعبیاں اچ لوکاں کوں کیا ریلیف ݙے سڳدوں، ایں دے کیتے وسائل درکار ہن، شرح نمو تے برآمدات اچ اضافے کیتے مراعات ݙیوݨی ہوسن، آئی ایم ایف دی مینیجنگ ڈائریکٹر نال میݙی ڳالھ تھئی اے، انھاں پاکستان دی مخلصانہ کوششاں کوں سراہیا اے۔ وزیراعظم صدرِ مملکت آصف علی زرداری، مسلم لیگ (ن) دے سربراہ محمد نواز شریف، وزیراعلیٰ پنجاب مریم نواز شریف، پاکستان پیپلز پارٹی دے چیئرمین بلاول بھٹو زرداری، وزیراعلیٰ سندھ سید مراد علی شاہ، وزیراعلیٰ خیبر پختونخوا سہیل آفریدی اتے وزیراعلیٰ بلوچستان سرفراز بگٹی دا مشاورتی عمل اچ بھرپور تعاون تے شکریہ ادا کیتا۔