قومی اقتصادی کونسل آندے مالی سال دے سارے نکات دی اتفاقِ رائے نال منظوری ݙے ݙتی، قومی ترقیاتی بجٹ کیتے 3669 ارب روپے، پی ایس ڈی پی کیتے ہک ہزار ارب، صوبائی سالانہ ترقیاتی پروگرام کیتے 2218 ارب روپے تے ایس او ایز کیتے 451 ارب روپے مختص

اسلام آباد۔ 10 جون (اے پی پی) قومی اقتصادی کونسل آئندہ مالی سال 2026-27 دے قومی ترقیاتی بجٹ کیتے 3669 ارب روپے، وفاقی پی ایس ڈی پی کیتے ہک ہزار ارب، صوبائی سالانہ ترقیاتی پروگرام کیتے 2218 ارب روپے تے ایس او ایز کیتے 451 ارب روپے مختص کرݨ تے اڑان پاکستان دے تحت قومی اقتصادی ترقی دے 11 مشنز دی منظوری ݙے ݙتی جڈانجو وزیراعظم محمد شہباز شریف قومی اقتصادی کونسل دے اجلاس دے سارے نکات دی اتفاقِ رائے نال منظوری تے شرکاء دا شکریہ ادا کریندیں ہوئیں آکھیے جو قومی امور تے اتفاقِ رائے نال فیڈریشن ٻیا مضبوط تھیسی، اتفاق و اتحاد دا جذبہ پاکستان دے روشن مستقبل دا ضامن اے۔ وزیراعظم آفس دے میڈیا ونگ توں جاری تھیوݨ آلے بیان دے مطابق وزیراعظم محمد شہباز شریف دی صدارت قومی اقتصادی کونسل دا اجلاس بدھ کوں اتھاں تھیا۔ وزیراعظم مشکل معاشی حالات اچ وفاقی حکومت توں مثالی تعاون تے چاریں وزرائے اعلیٰ توں اظہارِ تشکر کریندیں ہوئیں آکھیے جو وفاق اکائیاں دے درمیان ایں یکجہتی تے تعاون دے جذبے نال ملک ترقی کریسی۔ وزیراعظم ملک اچ معاشی استحکام کیتے کوششاں تے معاشی ٹیم دی کارکردگی دی پذیرائی کیتی۔ اجلاس دے شرکاء خلیج اچ حالیہ کشیدگی نال عالمی معیشت اچ منفی اثرات دے باوجود پاکستانی معیشت کوں مستحکم رکھݨ تے خطے اچ کشیدگی دے خاتمے کیتے سفارتی کوششاں تے وزیراعظم کوں خراجِ تحسین پیش کیتا۔ وزیراعظم اجلاس توں خطاب کریندیں ہوئیں آکھیے جو ودھدی ہوئی آبادی ملک کوں درپیش وݙے چیلنجز اچوں ہک اے۔ انھاں آکھیے جو بہترین صحت دے نظام دے ذریعے بیماریاں دے ودھدے بوجھ اچ کمی، ٻالاں دی صحت بالخصوص سٹنٹنگ دا خاتمہ، سکول توں باہر ٻالاں کوں تعلیم دی فراہمی تے نوجواناں کیتے روزگار دے مواقع پیدا کرݨا قومی ترجیحات ہن۔ انھاں آکھیے جو حکومت نوجواناں کوں فنی تے پیشہ ورانہ مہارتوں نال آراستہ کرݨ دی حکمتِ عملی تے کاربند اے، برآمدات تے مبنی معیشت ترقی کیتے اولیں ترجیح اے۔ وزیراعظم وفاق تے صوبیاں دے ترقیاتی منصوبیاں اچ ہم آہنگی پیدا کرݨ دی ہدایت کریندیں ہوئیں آکھیے جو ترقیاتی منصوبیاں کوں قومی ترجیحات تے پائیدار معاشی اہداف دے مطابق ترتیب ݙتا ونڄے۔ انھاں آکھیے جو مشترکہ قومی کوششاں نال پاکستان کوں ترقی، خوشحالی تے معاشی خود انحصاری دی منزل تئیں پڄیسوں۔ اجلاس اچ قومی اقتصادی کونسل دے 4 نکاتی ایجنڈے دی اتفاقِ رائے نال منظوری ݙتی ڳئی۔ اجلاس کوں مالی سال 2025-26 کیتے معیشت دی کارکردگی دے حوالے نال نظرِ ثانی شدہ اشاریے پیش کیتے ڳئے ہن۔ اجلاس کوں ݙسایا ڳیا جو مالی سال 2025-26 اچ وفاقی پی ایس ڈی پی تے 820 ارب، صوبیاں دے سالانہ ترقیاتی منصوبیاں تے 2938 ارب تے ایس او ایز پروگرام تے 355 ارب روپے خرچ کیتے ویندے پئن۔ اجلاس مالی سال 2026-27 کیتے قومی ترقیاتی بجٹ کیتے 3669 ارب روپے مختص کرݨ دی منظوری وی ݙے ݙتی۔ قومی اقتصادی کونسل وفاقی پی ایس ڈی پی کیتے ہک ہزار ارب، صوبائی سالانہ ترقیاتی پروگرام کیتے 2218 ارب روپے تے ایس او ایز کیتے 451 ارب روپے مختص کرݨ دی منظوری ݙتی۔ قومی اقتصادی کونسل 2025-26 کیتے مجموعی قومی پیداوار دی 3.7 فیصد شرح نمو تے اگلے مالی سال کیتے 4 فیصد شرح نمو دی منظوری ݙے ݙتی۔ قومی اقتصادی کونسل متعلقہ وزارتاں، صوبیاں تے سرکاری اداریاں کوں ہدایت کیتی جو مجوزہ سالانہ پلان 2026-2027 دے اہداف دے حصول کیتے وزارتِ منصوبہ بندی دے نال رل تے کم کرن۔ اجلاس کوں اپریل 2025ء توں مارچ 2026ء تئیں سی ڈی ڈبلیو پی تے ایکنک دی کارکردگی دی رپورٹ وی پیش کیتی ڳئی۔ اجلاس کوں ݙسایا ڳیا جو ایں عرصے دے دوران سی ڈی ڈبلیو پی 316 ارب روپے دیاں 116 سکیماں جڈانجو ایکنک 5.117 کھرب روپے دی 72 سکیماں دی منظوری ݙتی۔ اجلاس کوں 2025-26 دے میگا منصوبیاں دی نگرانی تے جائزے دی رپورٹ وی پیش کیتی ڳئی۔ اجلاس کوں ݙسایا ڳیا جو جائزے تے نگرانی دی نویں پالیسی وی تشکیل ݙتی ڳئی اے جئیں اچ ترقیاتی منصوبیاں دی اے آئی (AI) دے ذریعے بھی جانچ پڑتال دا پائلٹ منصوبہ شامل اے۔ قومی اقتصادی کونسل اڑان پاکستان دے تحت قومی اقتصادی ترقی دے 11 مشنز دی منظوری ݙتی۔ وزارتِ منصوبہ بندی و ترقی کوں انھاں مشنز دی وزارتاں تے صوبائی حکومتاں توں رل تے روڈ میپ تیار کرݨ دی ہدایت کیتی ڳئی۔ وزیراعظم قومی اقتصادی کونسل دے اجلاس دے سارے نکات دی اتفاقِ رائے نال منظوری تے شرکاء دا شکریہ ادا کیتا اتے آکھیے جو قومی امور تے ایں طرزیح اتفاقِ رائے نال وفاق ٻیا مضبوط تھیسی تے اتفاق و اتحاد دا ایہو جذبہ پاکستان دے روشن مستقبل دا ضامن اے۔ اجلاس اچ نائب وزیراعظم و وزیرِ خارجہ سینیٹر محمد اسحاق ڈار، وزیرِ دفاع خواجہ محمد آصف، وزیرِ منصوبہ بندی ڈاکٹر احسن اقبال، وزیرِ اقتصادی امور احد خان چیمہ، وزیرِ خزانہ محمد اورنگزیب، وزیراعظم دے مشیر رانا ثناء اللہ دے نال نال وزیراعلیٰ سندھ سید مراد علی شاہ، وزیراعلیٰ خیبر پختونخوا محمد سہیل آفریدی، وزیراعلیٰ بلوچستان نواب سرفراز بگٹی، پنجاب دی سینئر وزیر مریم اورنگزیب تے قومی اقتصادی کونسل دے ٻئے ارکان شریک ہن۔