اقتصادی سروے 2025۔26ء: پیمرا، پی ٹی وی تے ریڈیو پاکستان دے ذریعے میڈیا شعبے اچ اصلاحات تے ڈیجیٹل رسائی اچ نمایاں پیشرفت

اسلام آباد۔ 11 جون (اے پی پی) اقتصادی سروے 2025۔26ء اچ وزارتِ اطلاعات و نشریات دے ماتحت اداریں، پاکستان الیکٹرانک میڈیا ریگولیٹری اتھارٹی (پیمرا)، پاکستان ٹیلی ویژن (پی ٹی وی) تے پاکستان براڈکاسٹنگ کارپوریشن (ریڈیو پاکستان) دی کارکردگی تے اصلاحاتی اقدامات کوں اجاگر کریندے ݙسایا ڳیا جو جاری مالی سال دے دوران میڈیا سیکٹر دی تنظیم، نشریاتی معیار دی بہتری، تکنیکی اپ گریڈیشن، عوامی آگاہی، قومی بیانیے دے ودھارے تے ڈیجیٹل رسائی ودھاوݨ کیتے ٻہوں اہم اقدامات کیتے ڳئے جڈانجو نشریاتی اداریں دی استعداد کار اچ ودھارے کیتے خطیر فنڈز وی مختص کیتے ڳئے۔جاری کیتے ڳئے اقتصادی سروے 2025۔26ء دے مطابق پیمرا 31 مارچ 2026ء تئیں پاکستان اچ 142 سیٹلائٹ ٹی وی لائسنس جاری کیتے جنھاں اچ 49 نیوز اینڈ کرنٹ افیئرز، 47 تفریحی، 21 علاقائی زباناں، 3 صحت، 6 کھیݙاں، 9 تعلیم، 6 نان کمرشل تعلیمی تے 1 زراعت متعلق چینل شامل اے۔ ایں طرزیح 31 مارچ 2026ء تئیں مجموعی طور تے 240 ایف ایم ریڈیو لائسنس جاری کیتے ڳئے جنھاں اچ 172 کمرشل تے 68 نان کمرشل چینل شامل ہن۔ پیمرا جولائی توں مارچ 2025۔26ء دے دوران ہک ٹی وی لائسنس جاری کیتا جڈانجو ایف ایم ریڈیو دا ہک لائسنس جاری کیتا۔ 31 مارچ 2026ء تئیں 2951 کیبل ٹی وی لائسنس جاری کیتے ڳئے، 28 لینڈنگ رائٹس پرمیشنز جاری کیتیاں ڳئیاں، ایں طرزیح موبائل ٹی وی دے ترائے، انٹرنیٹ پروٹوکول ٹی وی دے 33، ڈی ٹی ایچ دا ہک تے ٹیلی پورٹ (براڈ کاسٹ) دا ہک لائسنس جاری کیتا ڳیا۔ پیمرا دی طرفوں جولائی 2025ء توں مارچ 2026ء تئیں مجموعی طور تے 77 کیبل ٹی وی دے لائسنس جاری کیتے ڳئے جڈانجو ہک لینڈنگ رائٹس پرمیشن دا لائسنس ݙتا ڳیا۔اقتصادی سروے 2025۔26ء دے مطابق پاکستان ٹیلی ویژن کارپوریشن لمیٹڈ (PTV) بطور قومی نشریاتی ادارہ آپݨیاں خدمات جاری رکھی ہوئی اے جیڑھا ملک دی ثقافتی، سماجی تے مذہبی اقدار دے مطابق تعلیم، معلومات تے تفریحی مواد ݙیندے۔ ادارہ قومی تے مذہبی تقریبات دی کوریج اچ مرکزی کردار ادا کریندے تے انھاں کوں مناسب اہمیت دے نال نشر کریندے جڈانجو ایں دے پروگرام، خصوصاً ڈرامے، معاشرتی اقدار دی عکاسی دے نال معیاری تفریح وی ݙیندن۔ پی ٹی وی کھیݙاں دی نشریات اچ وی اہم کردار ادا کریندے تے قومی و بین الاقوامی اہم ایونٹس دی کوریج پیش کریندے۔ اے نیٹ ورک ٻہوں چینلز تے مشتمل اے جنھاں اچ پی ٹی وی ہوم، پی ٹی وی نیوز، پی ٹی وی سپورٹس، پی ٹی وی گلوبل، پی ٹی وی نیشنل، پی ٹی وی بولان، اے جے کے ٹی وی تے پی ٹی وی پارلیمنٹ شامل ہن جیڑھے مختلف ناظرین دی ضرورتاں کوں پورا کریندن۔ ملک اچ ایں دی زمینی نشریات (Terrestrial Coverage) تقریباً 100 فیصد آبادی تئیں رسائی رکھیندیاں ہن جڈانجو ایں دا بین الاقوامی نشریاتی نیٹ ورک پاکستان دے مؤقف تے ثقافتی شناخت کوں عالمی سطح تے اجاگر کریندے۔30 جون 2025ء تئیں ملک اچ رجسٹرڈ ٹی وی سیٹ ہولڈرز دی تعداد 2 کروڑ 64 لکھ 7 ہزار 427 ہئی، مالی سال 2026ء دے دوران حکومت پبلک سیکٹر ڈویلپمنٹ پروگرام (PSDP) دے تحت پاکستان ٹیلی ویژن کیتے 1.01 ارب روپے مختص کیتے تاں جو نشریاتی تے ٹیلی کاسٹنگ آلات کوں جدید تقاضیں موجب اپ گریڈ کیتا ونڄ سڳے۔ ایں اقدام دا مقصد نشریاتی سگنل دے معیار کوں بہتر بݨاوݨ تے تکنیکی انفراسٹرکچر کوں جدید خطوط تے استوار کرݨا اے تاں جو ادارہ نشریاتی معیار کوں مزید بہتر بݨا سڳے۔اقتصادی سروے اچ آکھیا ڳئے جو پاکستان براڈکاسٹنگ کارپوریشن (PBC) قومی ریڈیو نشریاتی ادارے دے طور تے فرائض انجام ݙیندی پئی اے جیں دی ذمہ داری عوام کوں معلومات، تعلیم تے تفریح ݙیوݨ دے نال نال قومی تے بین الاقوامی سطح تے حکومتی پالیسیاں تے قومی بیانیے دی مؤثر ترویج وی اے۔ آپݨیاں خبراں تے پروگراماں دے ذریعے پی بی سی عوامی شعور اجاگر کرݨ، غلط معلومات تے منفی ٻاہرلے بیانیں دا مؤثر جواب ݙیوݨ اچ اہم کردار ادا کریندے۔ ادارہ اسلامی اقدار، قومی یکجہتی، جمہوری اصولاں، برداشت، مساوات تے سماجی انصاف دے ودھارے اچ وی معاونت ݙیندے۔ ایں توں انڄ، پاکستان براڈکاسٹنگ کارپوریشن قومی و علاقائی زباناں تے ثقافت دے ودھارے و تحفظ اچ کردار ادا کرݨ دے نال قومی اتحاد تے سماجی ہم آہنگی دے ودھارے کیتے ہک مؤثر پلیٹ فارم دے طور تے کم کریندی پئی اے۔مالی سال 2026ء اچ پاکستان براڈکاسٹنگ کارپوریشن دے ملازمین دی تنخواہواں تے آپریشنل اخراجات کیتے 6.27 ارب روپے مختص کیتے ڳئے جنھاں اچوں جولائی تا مارچ 2026ء دے دوران 4.63 ارب روپے جاری کیتے ڳئے۔ جولائی تا مارچ مالی سال 2026ء دے دوران ریڈیو پاکستان قرآنِ پاک دی تلاوت، روزانہ مذہبی پروگرامز، رمضان المبارک تے ربیع الاول دی خصوصی نشریات، اہم مذہبی تقریبات دی براہِ راست کوریج تے اسلامی تعلیمات، بین المذاہب ہم آہنگی تے سماجی اقدار دے فروغ کیتے خصوصی آگاہی پروگرام نشر کیتے۔ صدرِ مملکت تے وزیراعظم دے اہم بین الاقوامی دوریں، عالمی فورمز تے دوست ملکاں دے نال سفارتی روابط دی بھرپور کوریج کیتی ڳئی تاں جو خارجہ پالیسی تے ݙوطرفہ تعاون متعلق معلومات مؤثر انداز اچ عوام تئیں پڄائی ونڄ سڳن۔ مکمل تھیوݨ آلے میگا منصوبیں دی افتتاحی تقریبات تے جاری ترقیاتی منصوبیں دی پیش رفت کوں اجاگر کیتا ڳیا جڈانجو 20 ہزار 250 توں ودھ خصوصی پروگرامز نشر کیتے ڳئے۔خواتین کوں بااختیار بݨاوݨ تے سماجی تحفظ دے اقدامات کوں ودھارا ݙیوݨ کیتے حکومتی پروگرامز دی کوریج تے “سکھی گھر“ دے 234 خصوصی پروگرامز نشر کیتے ڳئے جڈانجو ورکنگ ویمن ہاسٹلز تے ڈے کیئر سہولتاں متعلق آگاہی وی ݙتی ڳئی۔ نوجواناں دی ترقی کیتے “اڑان پاکستان” تے وزیراعظم یوتھ پروگرام توں متعلق خصوصی پروگرامز، 11 ہزار توں ودھ نشریات تے آگاہی مہمات چلائیاں ڳئیاں تاں جو تعلیم، مہارت، روزگار تے امید افزا موقع کوں ودھارا ݙتا ونڄ سڳے۔ قومی سلامتی تے عوامی آگاہی متعلق 33 ہزار 750 توں ودھ نشریات اچ نظرثانی شدہ قومی ایکشن پلان 2021ء، غیر قانونی ہجرت، انسانی اسمگلنگ، مسلح افواج تے قانون نافذ کرݨ آلے اداریں دے کردار کوں اجاگر کیتا ڳیا جڈانجو منفی پروپیگنڈے تے غلط معلومات دا مؤثر جواب ݙتا ڳیا۔ شجرکاری، بریسٹ کینسر، ڈینگی، پولیو، انسدادِ منشیات، نمونیا، انسانی اسمگلنگ، ٹریفک سیفٹی تے اسموگ جیھے اہم عوامی و ماحولیاتی موضوعات تے خصوصی آگاہی مہمات چلائیاں ڳئیاں۔ مقبوضہ جموں و کشمیر دے حوالے نال یومِ استحصالِ کشمیر، کشمیر بلیک ڈے، حقِ خودارادیتِ کشمیر ڈے تے یومِ یکجہتیِ کشمیر تے خصوصی نشریات نشر کیتیاں ڳئیاں تاںجو کشمیری عوام نال اظہارِ یکجہتی کیتا ونڄ سڳے۔ریڈیو پاکستان سوشل میڈیا تے آپݨی موجودگی کوں نمایاں طور تے ودھایا، سوشل میڈیا سیل قائم کیتا، 50 توں ودھ اسٹیشنز دی انٹرنیٹ اسٹریمنگ، لائیو پروگرامز تے پوڈکاسٹس دے ذریعے نوجواناں تئیں رسائی بہتر بݨائی جیں دے نتیجے اچ فیس بک، ٹک ٹاک تے یوٹیوب تے لکھاں ویوز تے انٹرایکشنز حاصل تھئے جڈانجو یوٹیوب سلور بٹن جیھے اعزازات وی حاصل کیتے ڳئے۔ مالی سال 2026ء دے دوران ریڈیو پاکستان آمدݨ اچ ودھارے کیتے اقدامات کیتے، اسٹیشنز دی کارکردگی ماہانہ بنیاداں تے مانیٹر کیتی ڳئی جڈانجو جولائی توں مارچ مالی سال 2026ء دے دوران 4 کروڑ 43 لکھ روپے دی آمدݨ ریکارڈ کیتی ڳئی۔ نیوز اینڈ کرنٹ افیئرز ونگز حکومتی اقدامات، اقتصادی پیش رفت، اعلیٰ سطحی سفارتی سرگرمیاں تے بین الاقوامی فورمز دی جامع کوریج ݙتی تاں جو حکومتی پالیسیاں دی مؤثر تشہیر، عوامی آگاہی تے قومی مؤقف کوں ملکی و عالمی سطح تے اجاگر کیتا ونڄ سڳے۔