آندے مالی سال کیتے 3,675 ارب روپے دے قومی ترقیاتی اخراجات دی منظوری

اسلام آباد۔ 12 جون (اے پی پی) قومی اقتصادی کونسل (این ای سی) مالی سال 2026-27 کیتے 3,675 ارب روپے دے قومی ترقیاتی اخراجات دی منظوری ݙے ݙتی اے جیڑھا مالیاتی دٻاؤ دے باوجود ترقیاتی سرگرمیاں کوں ترجیح ݙیوݨ دے حکومتی عزم دا واضح اظہار اے۔ منظور شدہ ترقیاتی اخراجات اچ وفاقی پبلک سیکٹر ڈویلپمنٹ پروگرام (پی ایس ڈی پی) کیتے 1,000 ارب روپے، صوبائی سالانہ ترقیاتی پروگراماں (اے ڈی پیز) کیتے 2,224 ارب روپے جڈانجو سرکاری ملکیتی اداریں (ایس او ایز) دے ترقیاتی منصوبیں کیتے 451 ارب روپے مختص کیتے ڳئن۔حکومت پی ایس ڈی پی 2026-27 کوں محدود مالی وسائل تے مالیاتی نظم و ضبط دے تقاضیں موجب ترتیب ݙتے تاں جو ایں اچ اعلیٰ ترجیحی تے قومی اہمیت دے حامل منصوبیں کوں خصوصی اہمیت ݙتی ڳئی اے۔ ترقیاتی پروگرام کوں 13 ویں پنج سالہ منصوبے، ’’اڑان پاکستان‘‘ تے فائیو ایز (5Es) حکمتِ عملی دے اہداف نال ہم آہنگ بݨایا ڳئے جنھاں اچ برآمدات، ڈیجیٹل پاکستان، ماحولیات، توانائی و انفراسٹرکچر تے مساوات و بااختیاری شامل ہن۔ ترقیاتی پروگرام دے تحت آئی ٹی انفراسٹرکچر، مصنوعی ذہانت (اے آئی)، علاقائی رابطے، توانائی تے آبی تحفظ دے منصوبیں کوں ترجیح ݙتی ڳئی اے۔پبلک سیکٹر ڈویلپمنٹ پروگرام ملکی تے غیر ملکی وسائل کوں متحرک کرݨ دا ہک اہم عملی ذریعہ اے جیں دا مقصد معیشت دے مختلف شعبیں اچ ترقی کوں ودھارا ݙیوݨ اے۔ اے پروگرام قومی ترقیاتی فریم ورک دے تحت طے شدہ اہداف دے حصول کیتے حکومت دے عزم دی عکاسی کریندے تے 13 ویں پنج سالہ منصوبے، ’’اڑان پاکستان‘‘ تے فائیو ایز حکمتِ عملی دے مطابق متوازن، منصفانہ، جامع تے پائیدار ترقی کوں یقینی بݨیندے۔ ایں دے علاوہ اہم انفراسٹرکچر منصوبیں دی وقتی تکمیل کیتے وی مناسب وسائل مختص کیتے ڳئن تاں جو معاشی سرگرمیاں کوں مزید ودھارا ݙتا ونڄ سڳے۔حکومت معاشرے دے کمزور طبقیں دی ترقی تے بااختیاری کیتے دانش سکول پروگرام دے دائرہ کار کوں وسعت ݙیوݨ تے اعلیٰ تعلیم دے شعبے کیتے گزریل سال دے مقابلے اچ زیادہ فنڈز مختص کرݨ دا فیصلہ کیتے۔ آزاد جموں و کشمیر، گلگت بلتستان تے خیبر پختونخوا دے نویں ضم شدہ اضلاع دی ترقیاتی ضرورتاں کوں سامݨے رکھیندے انھاں علاقیں کیتے وی مناسب مالی وسائل مختص کیتے ڳئن تاں جو ملک اچ متوازن تے جامع ترقی کوں یقینی بݨایا ونڄ سڳے۔ وفاقی وزیر منصوبہ بندی، ترقی و خصوصی اقدامات پروفیسر احسن اقبال دی قیادت اچ تیار کیتے ڳئے پی ایس ڈی پی 2026-27 دا مقصد پائیدار معاشی ترقی، روزگار دے موقع اچ ودھارا، جدید ٹیکنالوجی دے  ودھارے تے عوامی فلاح و بہبود دے منصوبیں کوں تکھی رفتار بنیاداں تے مکمل کرݨ اے۔