وزارتِ منصوبہ بندی، ترقی تے خصوصی اقدامات دا ’’اڑان پاکستان‘‘ پروگرام دے تحت آندے مالی سال 2026-27 کیتے سالانہ ترقیاتی پروگرام جاری

اسلام آباد۔ 12 جون (اے پی پی) وزارتِ منصوبہ بندی، ترقی تے خصوصی اقدامات ’’اڑان پاکستان‘‘ پروگرام دے تحت آندے مالی سال 2026-27 کیتے سالانہ ترقیاتی پروگرام (اے ڈی پی) جاری کیتے۔ اتھاں جاری اے ڈی پی موجب پروگرام اچ میکرو اکنامک فریم ورک دی ترقی، سرمایہ کاری تے بچتاں تے خصوصی توجہ ݙیندے آندے مالی سال کیتے مجموعی قومی پیداوار (جی ڈی پی) دی شرح نمو کیتے 4 فیصد دا ہدف مقرر کیتا ڳئے، جڈانجو زراعت دے شعبے کیتے شرح نمو 3.6 فیصد، صنعت کیتے 4.5 فیصد تے خدمات دے شعبے کیتے 4.2 فیصد دی شرح نمو دا ہدف مقرر کیتا ڳئے۔اے ڈی پی موجب جاری مالی سال دے دوران افراطِ زر دی اوسط شرح 7.1 فیصد رہی، جڈانجو آندے مالی سال دے دوران افراطِ زر 8.2 فیصد رہݨ دی توقع اے۔ مزید جی ڈی پی دے مقابلے اچ سرمایہ کاری دا ہدف 15 فیصد جڈانجو بچتاں دا ہدف 14.3 فیصد مقرر کیتا ڳئے۔ سالانہ ترقیاتی پروگرام اچ آندے مالی سال کیتے حساباتِ جاریہ (کرنٹ اکاؤنٹ) دا خسارہ 3.6 ارب ڈالر رہݨ دی توقع اے جیڑھا جی ڈی پی دے 0.70 فیصد دے مساوی تھیسے، جڈانجو ایں دوران مختلف مصنوعات دا برآمدی ہدف 32.9 ارب ڈالر تے خدمات دے شعبے دی برآمدات دا ہدف 11.3 ارب ڈالر مقرر کیتا ڳئے۔آندے مالی سال دے دوران مجموعی قومی درآمدات 83.8 ارب ڈالر تئیں رہݨ دی توقع اے جیں اچ مصنوعات دی درآمدات 70 ارب جڈانجو خدمات دی درآمدات 13.8 ارب ڈالر متوقع ہن۔ اے ڈی پی دے تحت آندے مالی سال اچ ٻاہرلے ملک پاکستانیاں دی طرفوں 42.4 ارب ڈالر دی ترسیلاتِ زر متوقع ہن۔آندے مالی سال کیتے قومی اقتصادی کونسل سالانہ ترقیاتی پروگرام دی منظوری ݙتی اے جیں دا حجم 3675 ارب روپے مقرر کیتا ڳئے۔ مجموعی ترقیاتی پروگرام اچ وفاق دا حصہ 451 ارب روپے، صوبیں دا حصہ 2224 ارب روپے جڈانجو حکومتی ملکیتی اداریں دا حصہ ہک ہزار ارب روپے مقرر کیتا ڳئے۔واضح رہے جو سالانہ ترقیاتی پروگرام اچ آندے مالی سال کیتے بنیادی ڈھانچے دا تجویز کیتا ڳیا ترقیاتی بجٹ 603 ارب روپے، سماجی شعبے کیتے 181 ارب روپے، گورننس کیتے 13 ارب، سائنس و ٹیکنالوجی کیتے 41 ارب، خصوصی علاقیں بشمول آزاد کشمیر و گلگت بلتستان کیتے 89 ارب، ضم شدہ ضلعیں کیتے 56 ارب، پیداواری شعبے کیتے 13 ارب روپے تے متفرق شعبہ جات کیتے 5 ارب روپے دا ترقیاتی بجٹ مختص کیتا ڳئے۔اے ڈی پی موجب آندے مالی سال دے دوران کوئٹہ کراچی شاہراہ این-25 دی تعمیر کیتے 100 ارب روپے، سکھر حیدرآباد موٹروے ایم-6 دی تعمیر کیتے 30 ارب، پاکستان ریلویز دی اپ گریڈیشن ایم ایل-ون منصوبے کیتے 25 ارب روپے، سندھ کوسٹل ہائی وے دی تعمیر و توسیع کیتے 25 ارب، نوابشاہ توں راجن پور میران ہائی وے کوں ݙو رویہ (ڈبل روڈ) کرݨ دے منصوبے کیتے 21 ارب روپے، سانگھڑ توں این-فائیو تئیں شاہراہ دی بہتری کیتے 13 ارب، مورو توں راجن پور این-فائیو دی بحالی و تعمیر کیتے 9 ارب، مہمند ڈیم ہائیڈرو پاور پراجیکٹ کیتے 26 ارب، داسو ہائیڈرو پاور پراجیکٹ کیتے 21 ارب، بلوچستان اچ چھل توں بحالی کیتے 17 ارب، دانش سکولاں دی تعمیر کیتے 22 ارب تے وزیراعظم یوتھ پروگرام کیتے 18 ارب روپے مختص کیتے ڳئن۔ ایں توں علاوہ مختلف ترقیاتی منصوبیں کیتے وی بجٹ مختص کیتا ڳئے۔سالانہ ترقیاتی پروگرام دے تحت آندے مالی سال 2026-27 کیتے مینوفیکچرنگ دے شعبے دی شرح نمو دا ہدف 5.7 فیصد جڈانجو وݙے صنعتی اداریں دے شعبے کیتے 5 فیصد دی شرح نمو دا ہدف مقرر کیتا ڳئے۔ وفاق حکومت بلیو اکانومی توں فیدہ چاوݨ کیتے آندے مالی سال دے دوران پاکستان نیشنل شپنگ کارپوریشن دے جہازاں کوں 30 تئیں ودھاوݨ دا ہدف مقرر کیتے، جڈانجو کورنگی فش ہاربر اچ برآمدات متعلق بنیادی ڈھانچے کیتے 1.048 ارب، کے ایس اینڈ ای وی انفراسٹرکچر دی اپ گریڈیشن کیتے 10.69 ارب روپے تے گڈانی شپ بریکنگ یارڈ دی جدید کاری کیتے 12.9 ارب روپے دا ترقیاتی بجٹ مختص کیتے۔ واضح رہے جو آندے مالی سال دے دوران آف شور تیل و گیس دی تلاش دے 23 مختلف بلاکس کوں آپریشنل کیتا ویسے۔سالانہ ترقیاتی پروگرام دے تحت آندے مالی سال دے دوران انفارمیشن ٹیکنالوجی تے ٹیلی کمیونیکیشن دی برآمدات کیتے 7.3 ارب ڈالر دا ہدف مقرر کیتا ڳئے، جڈانجو ڈیجیٹل انفراسٹرکچر تے کنیکٹویٹی دے مختلف منصوبیں توں سالانہ 60 ملین ڈالر دی برآمدات دے نال نال 7500 لوکاں کیتے ملازمت دے موقع وی پیدا کیتے ویسن۔ وفاقی حکومت ڈیجیٹل گورننس تے خدمات دی بہتری کیتے جامع حکمتِ عملی دے تحت اقدامات کوں یقینی بݨیسی۔ ایں طرزیح مہارتاں اچ ودھارے تے روزگار ݙیوݨ دے فروغ کیتے وزیراعظم یوتھ پروگرام دے تحت 3737 مختلف تربیتی پروگرامز دا انعقاد کیتا ویسے جیں دا مقصد 25 ہزار توں ودھ روزگار دے نویں موقع پیدا کرݨ اے۔سالانہ ترقیاتی پروگرام اچ ہائیر ایجوکیشن، سائنس و ٹیکنالوجی تے وی خصوصی توجہ مرکوز کیتی ویسے تے ایں حوالے نال آندے مالی سال دے دوران ایچ ای سی دا بجٹ 46 ارب روپے مقرر کیتا ڳئے، جڈانجو وزارتِ سائنس و ٹیکنالوجی کیتے 3.567 ارب روپے، 637 چھوٹے تے درمیانے درجے دے کاروباری اداریں دا قیام تے سٹیم کٹس ٹارگٹ دا ہدف 150 مقرر کیتا ڳئے۔ماحولیات تے موسمیاتی تبدیلی دے حوالے نال آندے مالی سال دے ترقیاتی پروگرام دے تحت 11.33 ملین نویں وݨ رادھے ویسن جڈانجو 23775 گرین جابز وی پیدا کیتیاں ویسن۔ غذائی تحفظ تے پائیدار ترقی کوں یقینی بݨاوݨ کیتے آندے مالی سال دے دوران زراعت، گلہ بانی، ماہی گیری تے جنگلات دے شعبے دی ترقی تے خصوصی توجہ مرکوز کیتی ویسے۔ ایں طرزیح توانائی تے بنیادی ڈھانچے دے حوالے نال سالانہ ترقیاتی پروگرام 2026-27 دے تحت 151258.945 ملین روپے دا ترقیاتی بجٹ مختص کیتا ڳئے، جڈانجو اڑان پاکستان پروگرام دے تحت 2030ء تئیں متبادل ذرائع توں بجلی دی پیداوار کوں 30 فیصد تئیں ودھارا ݙتا ویسے۔ ایں توں علاوہ قومی گرڈ اچ 3787 میگاواٹ شفاف توانائی وی شامل کیتی ویسے۔اے ڈی پی موجب آندے مالی سال دے دوران صحت، نیوٹریشن، بنیادی تے ثانوی تعلیم، روزگار دے موقع ݙیوݨ اچ ودھارا تے مہارتاں دی ترقی دے نال نال پائیدار متوازن ترقی تے توجہ مرکوز کیتی ویسے تاں جو گھٹ ترقی یافتہ علاقیں اچ سہولتاں ݙیوݨ کوں بہتر بݨایا ونڄ سڳے۔ غربت مکاوݨ تے سماجی ترقی دے اقدامات دے تحت آندے مالی سال دے دوران بے نظیر انکم سپورٹ پروگرام (بی آئی ایس پی) دی کفالت کوریج دا ہدف 10.2 ملین تئیں ودھایا ویسے۔ ایں توں علاوہ بی آئی ایس پی دے ہمدرد پروگرام دے نال نال پی جی ای پی منصوبے دے تحت 76676 گھراݨیں کوں پیداواری اثاثہ جات ݙیوݨ تے 51185 لوکاں کوں مختلف مہارتاں دی تربیت ݙتی ویسے۔ ایویں پاکستان پاورٹی ایلیویشن دے تحت 86 ہزارلوکاں کوں بلا سود قرضہ ݙیوݨ دا ہدف مقرر کیتا ڳئے، جڈانجو بنیادی ڈھانچے دے موسمیاتی تبدیلیاں دے خلاف بھرپور مزاحمت دے حامل 80 مختلف منصوبے وی مکمل کیتے ویسن۔ گورننس تے ادارہ جاتی اصلاحات دے تحت آندے مالی سال دے سالانہ ترقیاتی پروگرام اچ خصوصی اقدامات کوں یقینی بݨایا ویسے۔