وفاقی حکومت دا سرکاری ملازمین دی تنخواہیں تے پنشن اچ 7 فیصد، ڳھٹ توں ڳھٹ اجرت اچ 10 فیصد ودھارے دا اعلان

اسلام آباد۔ 12 جون (اے پی پی) وفاقی حکومت مالی سال 2026-27 دے وفاقی بجٹ اچ سرکاری ملازمین دی معاشی مشکلات دا ادراک کریندیں ہوئیں انھاں دی تنخواہیں تے پنشن اچ 7 فیصد اضافے دا اعلان کیتے، ملک اچ ڳھٹ توں ڳھٹ ماہانہ اجرت اچ 10 فیصد اضافہ جڈانجو انکم ٹیکس سرچارج کوں مکمل طور تے ختم کرݨ تے مختلف انکم سلیبز کیتے ٹیکس ریٹس اچ ڳھٹکی کرݨ دی تجویز پیش کیتی اے۔ جمعہ کوں قومی اسمبلی اچ بجٹ تقریر کریندیں ہوئیں وزیرِ خزانہ سینیٹر محمد اورنگزیب آکھیا جو مہنگائی دے دباؤ کوں گھٹ کرݨ کیتے سرکاری ملازمین تے ریٹائرڈ طبقے کوں ریلیف فراہم کرݨ حکومت دی اولین ترجیحات اچ شامل اے۔ انھاں ݙسایا جو ڳھٹ توں ڳھٹ ماہانہ تنخواہ اچ وی 10 فیصد اضافہ کیتا ویندا پئے تاں جو محنت کش طبقے دا معاشی تحفظ یقینی بݨایا ونڄ سڳے۔ وفاقی حکومت تنخواہ دار طبقے تے ٹیکساں دا بوجھ گھٹ کرݨ دا وعدہ پورا کریندیں ہوئیں انھاں تے عائد انکم ٹیکس سرچارج کوں مکمل طور تے ختم کرݨ تے مختلف انکم سلیبز کیتے ٹیکس ریٹس اچ ڳھٹکی کرݨ دی تجویز پیش کیتی اے۔ وزیرِ خزانہ تفصیلات ݙسیندے ہوئیں آکھیا جو 22 توں 32 لکھ روپے سالانہ کماوݨ آلیاں کیتے ٹیکس دی شرح 23 توں ڳھٹ کر تے 20 فیصد، 32 توں 41 لکھ آلیاں کیتے 30 توں گھٹ کر تے 25 فیصد، 41 توں 56 لکھ آمدنی تے 35 توں گھٹ کر تے 29 فیصد تے 56 توں 70 لکھ روپے تئیں سالانہ تنخواہ حاصل کرݨ آلیاں کیتے ٹیکس دی شرح 35 فیصد توں گھٹ کر تے 32 فیصد کرݨ دی تجویز اے۔ انھاں واضح کیتا جو سرچارج دے خاتمے تے سلیبز اچ ترمیم نال تنخواہ دار طبقے کوں وݙا ریلیف ملسے